Arru gant ’r Varkizes ’nn amzer
Ma renk pe genel, pe verwell,
Genell ar frouez d’oa konsevet,
En amzer ’r Markiz hi friet.
Genell a ra, gant kalz a boan,
Genell daou grouadur bihan,
Daou vugel kaer evel ann erc’h,
Unan ’oa mab, un-all ’oa merc’h.
Ar Varkizes a skriv lizer
Da gass d’hi friet, d’ar brezell,
Dont d’ober badeï he daou vugell,
Gant aoun na deufent da verwell.
P’arruas ul lizer gant-han,
’Oa en ur gombat ar gwasa ;
Lakad ’ra war gorn all lizer,
Ober badeï ’n daou vugel.
Pa ’z eo ar brezell achuët,
’R Markiz d’ar ger ’zo retornet ;
’R Markiz d’ar ger ’zo retornet,
Gant ur joa vraz en he speret.
Ebars ar ger pa ’z arrue,
Holl dut he di a zalude,
He briet hag he vugale,
Ur joa vraz hen defoa out-he……
Beza ’oa iwe gouarner
War ar pont braz a Bontgleïer (?)
Ma renk mont arre d’ann arme,
Allas ! he gark hen goulenne.
Euz ar ger pa ’z eo sortiet,
A ra ar gark euz he briet ;
A ra ar gark euz he briet
D’ur falz kulator da viret ;
Laret taol-pled euz ann ez-hi,
’Vel pa ve-z-han er ger gant-hi ;
Euz he briet he vugale,
Beteg ann de ma retornje.
Ar falz kulator ’oa neuze,
O leal beb-noz ha bemde,
En kompagnunes ann Itron,
En despet d’hi opinion.