Adlennet eo bet ar bajenn-mañ
Ama, skoet gant dorn Doue,
Tiskuiz tud koz ha bugale,
Tud a skiant, tud pinvidik,
Tud euruz ha tud reuzeudik.
Ann eil e-kever egile,
’Maint astennet, enn ho gwele,
Astennet ’nn ho gwele douar ;
Pebez anken, pebez glac’har !
Ann den huel, ann denn dister,
Ho deuz eur plankenn, eul linser,
Ha pemp troatad douar hep-ken ;
Er vered, setu tra peb den !
Digor eo bez Mari-Vonik,
Koanta plac’h voa enn Arvorik ;
E-penn ar bez setu he fenn,
Eur bern eskern enn he gichen.
Ama welann bez ma ferson,
Den a feiz ha den a galon ;
Bemdez e teu ann dudigou
War he vez da skuilla daelou.
