Guéned, 17 a viz meurh 1931
Colligite fragmenta…
- Eutru Stevan,
Get plijadur é huélou Breihiz Bro-Guéned mollein hou livr guerzenneu.
A houdé guerso é hanaùemb er lod brasan anehé. Guélet hur boé ind, strèuet duhont ha dumen é Dihunamb, è Kloh-di Ploué, è Kevèrereh er Vugalé…, hag é nep tu n’hur boé kavet fablenneu, sonnenneu, kannenneu ha guerzenneu ker kaër, ker braù, ken dudius.
Bremen en ou haveemb rah dastumet ar un dro, cherret perhuèh ha tolpet én ur braùig a livr e huéleemb én-nou kentélieu biskoah braùoh, biskoah reihoh aveit en oll, èl Er grillan hag er velionen, Er vran hag er luhern, Er chignan hag en éjon, Er labourér hag e vugalé… « Colligite fragmenta ne pereant. Cherret perhuèh toézad ker braù ha n’ou lausket ket de vonet de goll. »
Displéget e hues én-nè rah er péh e huélér ar er mézeu ; lakeit e hues pep tra de gonz : er gué, er lonned, en dud, er vro abéh aveit mélein en Eutru Doué, kannein gloér d’er Sent ha karein hur Bro santél :
Aveit omb, Bretoned a ziar er mézeu,
En e hues kampennet hiniù hou kuerzenneu !…
Hag é guirioné : « Treu er mézeu hun disk kerklouz
El en abilan doktored ! »
Buhé mab-dén e zou ar en doar ur skol perbadus ; er bed-men e vou aveit en ol èl ur livr bras e gaver de lén èn-nou, mar karér digor en deulegad ha cheleu é gonzeu, er hentélieu kaeran aveit ol er vuhé.
Hui e hues ind displéget d’emb én hou livr ha skriùet ė brehoneg Guéned, ker splann él ne gaver ket braùoh ér livreu gallek !
Er vugalė e gavou amen er sorbienneu kaeran hag er skol bouraplan e jauj doh ou oèd ; er ré vras e huélou en avizeu guellan de gondui ou buhé ; hag en ol e ziskou kreskein ou haranté aveit Doué ha Breih !
A. GUILLEVIC
v. b.
