E kreiz er leùiné ankoéhat n’hellér ket
En déieu ankinus én hur bro treménet.
A pe oé d’er gouian en erh ar en toenneu,
A bep tu d’en uéled, épad er filajeu,
E oé liés pen-konz é tiér Breih-Izél
Ag er hours ma oé groeit d’er véléan brezél.
E kartér Sant-Hilér é oé konzet dalbeh
Ag er beleg en doé skuillet é hoéd abéh,
Ha memb er ré vihan abret mat e houié
Hanù er beleg santél, dom Jojeb en Turnié.
Er roched e zougé, a pe oé bet lahet,
El un dras présius e chomas pèl goarnet
Er gér a Sant-Hilér, é ti Jojeb Er Strat ;
Er mercheu goed enni e oé guélet spis mat,
En trihuéh taul gléan e ziskoé ou léhieu,
Testoni glaharus ag er brasan drougeu.
Ah! perak é ma bet kollet er roched-sé ?
Un dra de hoarn perpet, ur trezol kaèr e oé.
Allas ! un dé benak ur vatéh dirézon
Hé ras d’ur pasajouré klask en alézon.
Er hol e zou gloézus ; bout zou neoah chomet
Restajeu aral guèl ag er beleg lahet :
Eih vlé a hantér-hant goudé ma oé multret.
Ataù ér memb tachad é gorv e oé doaret,
En dias ag er chapél édan er gorden kloh.
Deit chonj nezé d’en dud d’en inourein muioh
E chanjein léh dehou hag er lakat er hér
Enou betag hiniù, tostig tra d’en autér,
E chom é gorv santél a houdé er hours-sé.
Hag é hanù glorius e lénamb ar er bé
E seblant laret d’emb : « Groeit èl on hou tevér,
« Karet betag er marù Jézus-Krist, hur Salvér. »
Bremen él guéharal tud vras ha bugalė
En des chonj ér hartér ag en eutru Turnié ;
Etal é vé, der sul, é huelér liés mat
Estroh aveit unan gredus é patérat.
Hag er mammeu kristén get hou bugalègeu
E ia de zeulhinein dirak è relégeu ;
Tud klan, tud maheignet, e lar get guirioné
Ou dès kavet sekour é pedein ar é vé.
Chetu perak bremen énnou é chonjér hoah
Kerklouz avèl érauk, kerklous avèl biskoah.
