Pajenn:Le Strat - Guerzenneu Breih-Izel, 1931.djvu/207

— 207 —

D'arriù ben gouilieu-pask get é barréziéned.
Er veléan fidél, dom Talmon, dom Turnié
De chervij er barréz bu unan e chomé,
Ou deu n'hellent ket hoah ré liés un ziskoein,
Rak bout oé treiterion aveit ou diskériein.
Er chouanned êlkent ou goaranté perpet
Hag én tiér guellan é vezent reseuet.
Retirans dom Talmon e oé d'er liésan
E tachen Kerhourhiér, get famill er Bihan.
E ti Robig eué, Robig a Gervadieu,
Hag open é Kergoët, é ti Jean Kevredeu ;
Gellein e bras trézein en amzér a hiris.
Ha derhel pèl amzér de chervij en lliz.
Mès é gansort karet, dom Jojeb en Turnié
E oé deliet dehou meruel aveit er fé,
Kent pèl é oé galùet de skuillein ol é hoèd
Ha de rein é vuhé avèl er vartired.

————

Marù dom Jojeb en Turnié

————

Liés mat é vezé kuhet é Sant Hilér
E ti Jojeb er Strat, trézolér er hartér,
A pe saùé danjér aben ean um denné
En ur veinglé toulet doh hent Bertelamé.
Anemized er fé ne oent ket hemb gouiet
E oé é ti er Strat é chomé de guhet.
Ur huéh é arriùant a daul sompren én ti.
Gouian bras e hré hoah, en amzér e oé kri ;
Er béleg e gavant azéet doh en tan :
« Deit genemb aben kaèr, e larant ind, deit bean,
Bremen é vou lahet un dén ag er hornad
Ha ne fal ket dehou merùel hemb kovésat.
Chetu aveit petra é omb deit d'hou kavet.
Saùet, héliet-ni, pé groeit e gareet. »
— Pé rézon e hues hui de lahein en dén-sé ?
E lar dehé kentéh dom Jojeb en Turnié.
Ha reskondein e hrant : « Taùet, mar plij genoh,
Arriù e brei eùé hou tro devéhatoh. »
Hag é dro de verùel e zas, èl ma larent