Seitek dén a Bluniaù ar un dro get er mér
E ia bean de Bondi eit konz d’er Direktoér,
Cheleuet ind kentéh. Ol er véléan keih
De hortoz er lézen ag er forbañnereh
E vennér arrestein ha kondui hemb dalé
D’er prizon a Borh-Loeiz, er hloereg Klanch geté.
Er vugulion santél é kours avertiset
Um dennas get difré hag e chomas kuhet.
Er véléan oeit kuit, er bobl e huanadé :
Allas n’hellér ket mui kañnein inour de Zoué,
N’hellér ket mui reseu get en Iliz, hur mam,
Er sekourieu rekis aveit biùein divlam.
Kent pèl deu huigent dén a galon bretoned,
E hanù er lod brasan ag er barréziéned,
E houlennas kévret en ur féson nerhus
Er frankiz de héli guir religion Jézus.
« Ur religion hun es, e larent ind hardéh,
« Religion e garamb, e gareemb dalbéh.
« Mès penaus hé héli hemb en dout ministred ?
« Eit biùein ha meruel avèl guir Bretoned,
« Dobér hun es perpet ma vou hur béléan
« E konzein d’emh a Zoué, é tiskoein d’emb en Nean.
« Kak-sé goulen e hramb hur bugulion karet,
« Hun ilizieu eùé eit bout énné tolpet
« De bedein hur Salvér épad en overen ;
« Ha goulen e hramb hoah liberté pen-der-ben
« Aveit hur béléan de zonet d’hur guélet,
« A pe zigoéhou d’emb hun devéhan klinùed »
Er goulen nerhus-men ne oé ket bet kleùet.
Ataù é chomé hoah er véléan kuhet ;
Ne oé nameit unan, dom Huisant Guillermeu
E oé lausket é peah é kreiz en trebilleu.
Rok un herrad benak er mér en doé chonjet
Er lakat de blégein aveit bout sermantet.
Er béleg doh é fé um stagé muioh mui
Hag er mér arfleuet e hras monet d’é di
Eit er skrapein aben hag er has d’er Borh-Loeiz.
Kuré Sant Nikolas, rekis dehou aboeis
D’ur vanden soudarded e oé deit d’er hemér
Um apresté hemb trouz de lemel ag er gér
Més é vatéh chifet e lauskas tauleu krí
A pe huélas er mestr é monet ag en ti,
