Rak ma oent disentus doh er « Gouvernemant »
E houlenné geté gobér ur fal sermant.
Elsé hur bro kristén e oé goasket nezé
Edan sklavaj kalet éneberion er fé.
Hun tadeu Bretoned, tud nerhus a galon,
E oé chomet ataù fidél d’ou relijion,
Ha liés é varùent get er gred santélan
Aveit dihuen ou fé, dihuen ou béléan,
N’hellé ket er ré men lezel ou unan pen
Er fidéled a Vreih hemb ofis, overen.
En despet d’er lézen énep dehé douget,
Chomet e oent enta de sekour ou deved :
Kuhet duhont, dumen, én tiér, ér parkeu
Liés é hellent hoah rein er Sakremanteu,
Laret en overen ha predeg lézen Doué
Eit goarn ér haloneu trézol kaer er guir fé.
⁂
Aveit-oh, Pluniauiz, tud a mem bro karet,
Gobér er huerzen-men em es hiniù chonjet.
Me ven konz ag èvreu er véléan santél
En des én hou parréz hadet en aviél,
Er hours ker maleurus eit er geih Fransizion.
Ol ou des anduret aveit er religion
Trebilleu a bep sort, trebilleu hemb arsaù.
Memb unan a nehè ar en doar a Bluniaù.
En des skuillet é oèd aveit dihuenn er fé.
Oh! eurus int bremen étal en Eutru Doué !
Plijeet getè pedein aveit-omb, Pluniauiz,
Hag hur sekour eué d’arriù ér Baraouiz !
⁂
Bout oé d’er bihañnan eih béleg é Pluniaù
Pe saùas én hur bro en aùel divalaù
En des huéhet kement énep d’er relijion.
Dom Iouan er Mersié e oé nezé person ;
Er vorh é chomé hoah deu véleg, kuréet,
Dom Matelin Morvan ha dom Piér Kollet.
Er véléan aral strèuet ar er mézeu
E oé de getan pen Dom Huisant Guillermeu,
