Sell zo aman war ann dosen ;
Petra out-te enn he gichen ?
Eur fubuen, ne-kuir, mignon,
Ma vez e tal tour Babilon !
Ni ho salud, aotro Boujet,
Deut, ec’h omp aman d’ho kwelet,
Da glasq alc’houe ho ti rec’hel
Vit he welet arog tec’hel.
Gret oc’h euz eunn dra burzuduz,
Eur bern mein a zo estlammuz !…
Pa vezo war-n-han eur c’halver
E gwirione e vezo kaer !…
Hastomp, hastomp, mignon Hernot,
Diskenn ac’han beteg ann aot ;
Eno zo gerek tro war zro
Vel eunn emgann korfo maro.
Pa ra luc’het ha kuruno,
Pa goue grizil skorn a vernio,
E vent boulloc’h e Breiz-Izel
Eget n’eo aman ar rec’hel.
Piou en deuz gwelet el lec’h all,
Evel zo aman, tri men brall ?
Piou en deuz gwelet, gant eur groaz,
Evel zo aman, eur zant braz ?
Zant braz Tregastel, ni ho ped,
Pellet ac’han ar gorriged,
Ha miret deuz ann avel foll
Da gas aman listri da goll !
Enn ti roc’h vraz na lezit ket
Na noz na de al lutined ;
Ann ekleo avad a garfenn
A chomfe ebarz da viken.
Ha pa zeui ar mor da goenvi,
Miret a varo peb-hini ;
Miret ive a bep pec’hed
Neb a zeui aman d’ho kwelet.
Zalut ha kenavo, zant braz,
Eunn dro bennag m’ho kwelo c’hoaz,
Hag em be kant vloa da veva
M’ho kwelo aze enn ho sa !
