Pajenn:Le Gonidec - Bibl Santel pe Levr ar Skritur Sakr, levr Iañ.djvu/734

Eus Wikimammenn
Adlennet eo bet ar bajenn-mañ
700
levr ar psalmou.

9. Râk té eo, Aotrou, va géd ; kéméret éc’h eûz ann Uc’hel-meûrbéd évid da vénéc’hi.

10. Na zeûi két ann drouk bétég enn-od : hag ar walen na dôstai két oud da delt.

11. Râg gourc’hémennet en deûz d’hé élez diwar da benn : ma virin̄t ac’hanod enn da holl hen̄chou.

12. Étré hô daouarn é tougin̄t ac’hanod gan̄d aoun dré zarvoud na stokfez da droad oud eur méan ;

13. War ann aspik hag ar basilik é kerzi ; hag é flastri al léon hag ann aer.

14. O véza ma en deûz lékéat hé c’héd enn-oun, mé a dennô anézhan̄ a boan : hé zifenni a rinn, ô véza ma en deûz anavézet va hanô.

15. Garmi a rai étrézég enn-oun, ha mé a zélaouô out-han̄ ; émounn gan̄t-han̄ enn en̄krez : hé zieûbi a rinn, hag éc’h énorinn anézhan̄.

16. Hé leûn̄ia a rinn a zeisiou ; hag é tiskouézinn d’ézhan̄ va zilvidigez.


————


XCI. PSALM.


Psalm pé kanaouen évid deiz ar sabbat.


1. Mâd eo meûli ann Aotrou, ha kana d’as hanô, Uc’hel-meûrbéd,

2. Évid embanna da drugarez a-zoug ann deiz, ha da wirionez a zoug ann nôz,

3. War al liren dék-korden, gan̄t kanaouennou, ha war ann délen ;

4. O véza, Aotrou, ma éc’h eûz va diduellet gan̄d da labour : hag é trîdinn é ôberiou da zaouarn.

5. Péger brâz eo, Aotrou, da ôbériou ! Pegen doun eo da vénosiou !

6. Ann dén diskian̄t n’hô anavézô két ; hag ann dén diboell n’hô c’hlévô két.

7. Pa vézô savet ar béc’herien ével ar géot ; ha pa vézô en em ziskouézet ar ré holl péré a râ fallagriez ; hî a vézô kollet da-vikenn.

8. Hôgen té, Aotrou, a zô ann Uc’hel-meûrbéd a-viskoaz-da-vikenn.

9. Râk chétu da énébourien, ô Aotrou, râk chétu da énébourien a ia da goll ; hag ar ré holl a râ fallagriez a vézô skiñet.

10. Ha va galloud a vézô uc’héléet ével korn ann unikorn ha va c’hôzni a vézô leûniet gan̄d da drugarez.

11. Va lagad a zellô gan̄t faé out va énébourien ; ha va skouarn a glevô héb aoun ar ré fallagr a zavô em enep.

12. Ann dén reiz a vleûn̄vô ével ar wézen-balmez ; ével gwéz-sedr al Liban é kreskô hé niver.

13. Ar ré a zô plan̄tet é tî ann Aotrou, a vleûn̄vô é porched ti hon Doué.

14. Kreski a rain̄t adarré hô niver enn eur gôzni leûn a vadou ; hag hî a vézô habask brâz,

15. Évit ma embannin̄t : Péger reiz eo ann Aotrou hon Doué ; n’eûz fallagriez é-béd enn-han̄.


————


XCII. PSALM.


Meûleûdi pé kanaouen David enn derc’hen̄t ar sabbat, pa oé diazézet ann douar.


1. Ann Aotrou en deûz rénet ; gloar en deûz gwisket ; ann Aotrou en deûz gwisket nerz, hag eo en em c’hourizet. Râk startéet eo ar béd gan̄t-han̄ ha na vézô két kéflusket.

2. Da drôn a zô bét aozet a neûzé ; té a zô a viskoaz.

3. Saved eo ar steriou, Aotrou ; saved hô deûz ar steriou hô mouéz, saved hô deûz ar steriou hô c’hoummou,

4. Gan̄t mouésiou douréier brâz. Souézuz eo gorréérez ar môr, souézuz eo ann Aotrou enn envou.

5. Da desténiou a zô da véza krédet ; ar zan̄télez, ô Aotrou, a dlé béza da-vikenn skéd da dî.


————


XCIII. PSALM.


Psalm da Zavid, évid ar pévaré deiz goudé ar sabbat.


1. Doué ar ven̄jan̄sou eo ann Aotrou : Doué ar ven̄jan̄sou en deûz gréat pép trâ é pep fran̄kiz.