Pajenn:Le Garrec - Moueziou an Abardaë-Noz.djvu/96

Eus Wikimammenn
Sauter à la navigation Sauter à la recherche
Adlennet eo bet ar bajenn-mañ
— 92 —



Ha me kerkent da zoñjal en Breiz, va bro garet,
Zo ive gant ar galleg he yez koz mastaret,
Hag e vê klasket bemde, dre bep seurt troiou ka
Lakat he giziou kaera da gouea tamm ha tamm.

« Ma vijê bet — emon-me — lec’h tammou kudenned,
« Tud a boell hag a galon vel m’eo ar Vrezoned,
« ’Dijê biskoaz aotreet divrôiz d’o debri
« Na lapoused divalo da ren en o c’houldri. »

Met dén ebet na gredfê, penn-oc’h penn ganemp-ni,
Ouz ar Brezoneg santel ’n em lakat d’enebi ;
Rak biskoaz n’eo bet Breiziz trec’het ’med a guz-kaer ;
Hogen, an tu d’hen flastra dre zindan a glasker.

Er skoliou eo bet kavet an noazusa doare
Da skei gantañ hep ehan tôliou didrugare :
Skolerien, skolerezed a zo mistri brezel
Rôet d’ê vit kefridi laza yez Breiz-Izel.

Hini Bro-C’hall deu warnomp dre lannou dirollet
En eur c’holo bep kammed douar ganemp kollet :
Môr braz ar skridou galleg a zired eus Pariz
Pounneroc’h vid an hini zistrujas ar Gêr-Iz.

Breiziz zoken a glever war Vreiz oc’h ober fae,
Gwerzet gantê o fluenn, hag o zeod hag o fe ;
Kréñvât ’n hon touez ra bemde koagerez ar brini :
War zao, dubeed Arvor, divrânomp hon c’houldri !

Dilamm hon yez ganemp-ni vê dilamm hon ene :
Petra lârfê d’ar Breizad ar môr nag ar mene,
Nag an aveliou garo nag an noz spouronnek,
Ma vijê ket d’o fintañ ar geriou brezonek ?