rag an gernez a oa ken bras ; ha bro an Ejipt ha bro Kanaan a oa dinerzet gant an gernez. 14 Ha Josef a zastumaz an holl arc’hant a oa e bro Ejipt hag e bro Ganaan, e trok ouz an ed a brened. Jozef a gasaz an arc’hant-se e ti Faraon.
15 Pa oa aet da hesk an arc’hant e bro Ejipt hag e bro Ganaan, an holl Ejipsianed a zeuaz da gavout Jozef, o lavarout : Ro deomp bara ! Perak e varvfemp dirazout o vezan n’eus ken a arc’hant ?
16 Jozef a lavaraz : Roit ho loened, hag e roin deoc’h e trok ouz ho loened ma n’hoc’h euz ket a arc’hant ken.
17 Degaz a rejont o loened da Jozef, ha Jozef a roaz dezo bara e trok ouz ar c’hezeg, ouz an tropellou denved, ouz an tropellou ejened hag ezen. Rein a reaz dezo bara e trok ouz o holl dropellou er bloaz-se.
18 Ar bloaz-se tremenet, e tistrojont ar bloaz war-lerc’h hag e lavarjont : Ne guzimp ket da’m Aotrou penaos an arc’hant a zo aet holl ha penaos an tropellou loened a zo aet holl da’m Aotrou. Ne chom netra dirak va Aotrou nemet hor c’horfou hag hon douarou.
19 Perak e varvfemp dirak da zaoulagad, ni hag hon douarou ? Pren ac’hanomp, ni hag hon douarou, evit bara, hag e vimp sklaved da Faraon. Ro deomp peadra da hadan evit ma vevimp ha na varvimp ket ha na vo ket an douar glac’haret.
20 Jozef a brenaz holl zouar an Ejipt da Faraon, rag an Ejipsianed a werzaz pep hini anezhei e bark dre ma oa rust an naonegez. Hag an douar a voe da Faraon.
21 E kenver ar bobl, e lakeaz anezhei holl da vont er c’hêriou, adalek eur pen d’an Ejipt betek eur pen all.
22 Douarou an aberzourien a oa ar re hepken na brenaz ket, rag an aberzourien o doa eul loden merket digant Faraon hag e tebrent al loden a roe Faraon dezo. Setu perak ne werzjont ket o douarou.
23 Jozef a lavaraz d’ar bobl : Ho prenet em euz hiziv, c’hwi hag ho touarou, da Faraon ; setu aman evidoc’h had, evit ma hadot an douar.
24 En amzer an eost, e root eur bempveden da Faraon hag ar peder loden all a vezo deoc’h evit hadan ho parkeier, evit ho poued, evit hini tud ho tiegez hag evit boued d’ho pugale vihan.
25 Lavarout a rejont : Saveteet ec’h euz hor buez deomp ! Ra gavimp trugarez dirak daoulagad hon Aotrou hag e vimp sklaved da Faraon.
26 Jozef a reaz eul lezen a gement-se, hag a bad c’hoaz betek hiziv var zouarou an Ejipt : Ar bempveden da Faraon. Ne oe ken nemet douarou an aberzourien ne oant ket da Faraon.
27 Israel a chomaz e bro Ejipt, e bro C’hoshen, hag e prenjont dalc’hiou ; frouezus e oent hag e kreskjont meurbet.
28 Jakob a vevaz seitek vloaz e bro Ejipt. Deiziou bloaveziou buez Jakob a voe kant seiz vloaz ha daou-ugent.
29 Pa dostaaz deiz marv Israel, e c’halvaz e vab Jozef hag e lavaraz : Mar em euz kavet trugarez dirak da zaoulagad, laka, me az ped, da zorn dindan va morzed ha diskouez em c’henver madelez ha fealded : Da bedin a ran, na sebeilh ket ac’hanon en Ejipt.
30 Pa vin kousket gant va zadou, kaz ac’hanon euz an Ejipt ha sebeilh ac’hanon en o bez. En a respontaz : Me a raio hervez da c’her.
31 Lavarout a reaz : Tou din kement-se. Hag e touaz kement-se dezhan. Hag Israel a stouaz var ben e wele.
48 HAG e c’hoarvezaz goude an traou ze, ma voe lavaret da Josef : Setu, da dad a zo klanv. Neuze e kemeraz e zaou vab gantan, Manase hag Efraim.
2 Roet e oe kement-se da anavezout da Jakob, o lavarout dezhan : Setu, da vab Jozef a zeu da’z kavout. Neuze Israel a zastumaz e nerz hag a azezaz var e wele.
3 Jakob a lavaraz da Josef : An Doue holl-c’halloudek en em ziskouezaz din e Luz, e bro Ganaan, hag a vennigaz ac’hanon.
4 Lavarout a reaz din : Setu aman, e lakain ac’hanout da vezan frouezus ha da greski hag e rin ac’hanout eun engroez a vroadou, hag e roin ar vro-man da’z lignez var da lerc’h evit ma vo dezhi da viken.
5 brema, da zaou vab ganet dit e bro Ejipt a-raok ma’z on deuet da’z kavout en Ejipt, a vezo din. Efraim ha Manase a vezo d’in, evel Ruben ha Simeon. 6 Mes ar vugale da bere e vezi tad ho goude, a vezo d’id, galvet e vefont dre hano ho breudeur en heritach. 7 Evid-