7 Mes David en em nerzaz en Aotrou he Zoue, hag he lavaraz da Abiathar, ar sakrifier, mab Akimelek : Digas d’in, me az ped, an efod ; hag Abiathar a zigasaz an efod da Zavid. 8 Neuze David a guzultaz an Aotrou, o lavarout : Kenredek a rin ar vanden ze ? tapout a rin anezhi ? Hag He respountaz dezhan : Kenred ; rag a-dra-zur tapout a ri anezhei, hag ho delivri. 9 David a ieaz eta, gant ar c’hwec’h kant den a oa ganthan ; hag en em gavjont en dour-red Besor, el lec’h ma choumaz ar re a vane varlerc’h. 10 Evel se David ha pevar c’hant den a reaz ar c’henret ; daou c’hant a vanaz, re skwiz da dremen dour-red Besor.
11 Hag, he kavjont er parkeier eun den Ejiptsian pehini a zigaschont da Zavid, hag e rojont dezhan bara, pehini a zebraz, ha dour da eva ; 12 rei a rejont ive dezhan eur fiezen sec’h benag, ha daou dokat rezin sec’h. Dibri a reaz anezhei, hag ec’h adkemerez he spered ; rag n’hen doa ket debret a vara nag evet dour abaoe tri deiz ha teir nozvez. 13 Ha David a lavaraz dezhan : Da biou out ? hag a belec’h out ? Hag hen a respountaz : Me zo eur paotr Ejiptsian, servicher da eun den Amalekit ; ha va mestr hen deuz va dilezet, abalamour ma oan kwezet klanv, brema ez zo tri deiz. 14 Groet hon euz eur redaden er c’hreisteiz euz ar Gerethied, ha var ar pez a zo da Juda, hag er c’hreisteiz da Galeb, hag hon euz devet Tsiklag. 15 Neuze David a lavaraz dezhan : Ma ren a ri da gaout ar soudarded ze ? Hag hen a lavaraz dezhan : Tou d’in, dre hano Doue, penaoz n’am lazi ket, ha penaoz na lakai ket ac’hanoun entre daouarn va mestr, ha me a gaso ac’hanout da gaout ar zoudarded ze. 16 Hag e renaz anezhan ; ha setu, e oant sklabezet dre ar vro holl, o tibri, o c’heva hag ho tansal, abalamour d’an diwisk bras ho doa savet euz bro ar Filistined ha bro Juda. 17 Ha David ho c’hannaz, adaleg goulou deiz bete abardaez an deiz varlerc’h ; ha ne vanaz ket unan anezhei, nemert pevar c’hant den iaouank pere a biniaz var chamoed hag a dec’haz kwit. 18 Ha David a gavaz kement ho doa an Amalekited kemeret ; kavet a reaz ive he ziou vreg. 19 Ha ne vankaz nikun dezhei, na bihan, na bras, na mab, na merc’h, na netra euz an diwisk hag euz kement ho doa kaset ganthei ; David a zigasaz holl ganthan. 20 David a adkemeraz ive an holl loened bras ha munud ; hag he dud a valee en penn ar vanden ze hag a lavare : Hema eo diwisk David.
21 Neuze David a zeuaz da gaout an daou c’hant den pere a oa re skwiz da heuil David, ha da bere hen doa groet choumet en dour-red Besor. Hag e teujont araog David, ha diaraog ar bobl a oa ganthan. Ha David, o tostaat outhei, a c’houlennaz outhei penaoz a reent. 22 Mes an holl dud drouk ha fall, a douez ar re a oa eet gant David, a gemeraz ar gomz hag a lavaraz : Pa n’int ket deuet ganeomp, ni na rofomp dezhei netra euz an diwisk ? pehini hon euz dastumet, nemert da bep hini anezhei he vreg hag he vugale ; ma ho c’hemerfont ha ma ez afont kwit. 23 Mes David a lavaraz : N’eo ket evel se, va breudeur, a refet euz ar pez hen deuz an Aotrou roet deomp, pa Hen deuz miret, ha lakeat entre hon daouarn ar vanden a oa deuet en hon enep. Piou ho selaouo en kement se ? 24 Rag lod an hini a zisken d’ar brezel ha lod an hini a choum da ziwall an traou, a dle beza egal : lodenni a rafont asamblez. 25 Ha kement se a oe groet adaleg an deiz se, hag ez euz groet eur reolen hag eur c’his euz ze bete hirie.
26 David a zistroas eta da Tsiklag, hag a gasaz euz an diwisk da re ansien Juda, d’he vinioned, o lavarrout : Setu eur ro evidoc’h euz diwisk enebourien an Aotrou. 27 Kas a reaz d’ar re a oa en Bethel, d’ar re a oa en Ramoth ar c’hreisteiz, d’ar re a oa en Jatthir, 28 d’ar re a oa en Aroer, d’ar re a oa en Sifmot, d’ar re a oa en Esthemoa, 29 d’ar re a oa en Rakal, ha d’ar re a oa en keariou ar Jerakmeelied, 30 d’ar re a oa en keariou ar C’henied, 30 d’ar re a oa en Horma, d’ar re a oa en Kor-Ashan, d’ar re a oa en Athak, 31 ha d’ar re a oa en Hebron, hag en holl lec’hiou dre bere ho doa tremenet David, hen hag he dud.
31 Hag, ar Filistined en em gannaz a enep Israel, hag an Israelited a gemeraz an tec’h dirag ar Filistined, hag a oe lazet var menez Guiboa. 2 Hag ar Filistinod a genredaz Saül hag he vibien, hag a lazaz Jonathan, Abinadab, ha Malkishua, mibien Saül. 3 Ha bec’h an emgann a gwezaz var Saül hag an archerien a dapaz anezhan, hag e oe gwal vlesset gant an archerien. 4 Neuze Saül a lavaraz d’he floc’h : Tenn da gleze ha laz
