he hed, he ledander[1] hag he huelder a oa egal.
17 Muzuri a reaz ive ar voger, kant pevar ha daou-ugent ilinad, muzur den, pehini a oa hini an êl.
18 Ar voger[2] a oa masounet gant jasp, mes ar gear a oa a aour pur, henvel euz gwer pur. Ha soliou moger kear a oa ornet a bep sort mein prisiuz.
19 Ar c’henta[3] sol a oa a jasp ; an eil a safir ; an drived, a galsedoan ; ar bevared, a emerod ;
20 ar bempved, a sardoniks ; ar c’hweac’hved, a sard ; ar seizved, a grizolit ; an eizved, a beril ; an naoved, a dopaz ; an dekved, a grisopaz ; an unnekved, a hiasint ; an daouzekved, a ametist.
21 An daouzek dor a oa daouzek perlezen ; pep dor a oa euz a eur berlezen hepken, hag plas kear a oa evel eun aour pur henvel euz gwer sklear.
22 Ne weliz templ ebet ; rag an Aotrou Doue holl-c’halloudek hag an Oan eo an templ anezhi.
23 Hag ar gear[4] n’he deuz ezom nag euz an heol nag euz al loar, evit he skleria ;[5] rag gloar Doue a skleria anezhi, hag an Oan eo he goulaouen.
24 Hag ar boblou pere a vezo bet soveteet, a valeo euz he sklerijen,[6] ha rouane an douar a zigaso ennhi ho gloar hag ho enor.
25 He doriou ne vefont ket serret bemdez, rag ne vezo ket a noz ennhi.
26 Digaset e vezo ennhi gloar hag enor ar boblou.
27 N’az[7] ai ebarz netra a hudur,[8] na den hag en em ro d’an euzusted, na d’ar gaou, mes ar re ze hepken a zo skrivet ho hanoiou en levr a vuez an Oan.
22 Goude[9] kement se an êl a ziskwezaz d’in eur rivier[10] dour beo, sklear evel kristal, pehini a zeue euz a drôn Doue hag an Oan.
2 Hag[11] en kreiz plasen kear, ha var daou gostez ar rivier, e oa eur wezen a vuez, o tougen daouzek frouezen, o rei he frouez bep miz ; hag an deliou euz ar wezen a oa evit iec’hed ar baïaned.
3 Ne vezo malloz ebet ken ; ha trôn Doue hag an Oan eo a vezo ennhi, hag e zervicherien he zervicho.
4 Gwelet a rafont he fas,[12] hag e hano a vezo var ho zaliou.
5 Ne vezo ken a noz, ha n’ho devezo ken ezom euz a lamp ebet nag euz a sklerijen an heol, rag an Aotrou Doue ho sklerijeno hag e renfont a gantved da gantved.
6 Lavaret a reaz d’in neuze : Ar giriou ma a zo fidel[13] ha gwirion, hag an Aotrou, Doue zantel ar brofeded, hen deuz kaset he êl, evit diskleria d’he zervicherien an traou pere a dle c’hoarvezout prest.
7 Setu, e teuan prest ; euruz an hini a vir giriou profesi al levr ma !
8 Ha me, Ian, me eo an hini pehini em euz gwelet ha klevet an traou ma. Ha goude beza ho gwelet hag ho c’hlevet, en em daoliz[14] euz treid an êl pehini ho diskweze d’in evit he adori.[15]
9 Mes hen a lavaraz d’in : Diwall da ober se ; rag me eo da gensort er zervich, hag hini da vreudeur ar brofeded, hag hini ar re pere a vir giriou al levr ma. Ador Doue.
10 Lavaret[16] a reaz d’in : Na siel ket giriou profesi[17] al levr ma ; rag an amzer a zo tost.
11 An hini pehini a zo injust, ra vezo injust c’hoaz ; an hini pehini a zo hudur ra en em huduro c’hoaz ; an hini pehini a zo just,[18] ra vezo justoc’h c’hoaz ; hag an hini pehini a zo zantel, ra zeuo zantelloc’h c’hoaz.
12 Rag, setu, e teuan prest, ha ma gobr a zo ganen, evit rei da bep hini hervez an oberiou pere hen devezo groet.
13 Me eo an Alfa hag an Omega, ar c’henta hag an diweza, ar c’hommansamant[19] hag ar fin.[20]
14 Euruz[21] ar re a vir he c’hourc’hemenou, evit ma vezo ho lod er wezen a vuez, ha droet da vont dre an noriou en kear !
15 Mes er meaz e vezo ar re hudur, an ampouezounerien, ar c’hadelezourien,[22] al lazerien, an idolatred, ha piou benag a gar hag a ra ar gaou.
16 Me, Jesus em euz kaset va êl evit rei testeni euz an traou ma en Ilizou. Me eo grizien ha lignez David, stereden[23] lugernuz ar beure.
17 Ar Spered hag ar pried a lavar : Deuz. An hini pehini he glev, ra lavaro ive : Deuz. An hini hen deuz sec’hed, ra zeuo ; an hini a fell dezhan dour beo,[24] ra hen devezo evit netra.
18 Testenia a ran da biou benag a glev giriou profesi al levr ma, mar laka unan benag eun dra benag ennhan, Doue a lakaio da gweza varnezhan ar gouliou skrivet el levr ma ;
19 ha mar lam unan benag giriou euz a levr ar profesi ma, Doue a lamo e lod euz al levr a vuez, euz ar gear-santel, hag euz an traou pere a zo skrivet el levr ma.
20 An hini a ro testeni euz an traou ma a lavar : Ia, dont a ran prest.[25] Amen. Ia, Aotrou Jesus, deuz !
21 Gras hon Aotrou Jezuz-Krist ra vezo ganeoc’h holl ! Amen.
- ↑ lec’hed.
- ↑ vur.
- ↑ Ezai 54.11.
- ↑ Zak. 14.7.
- ↑ goulaoui.
- ↑ goulou.
- ↑ Ezai 35.8.
- ↑ lous.
- ↑ Ezek. 47.1.
- ↑ ster.
- ↑ C’han. 2.9.
- ↑ drem.
- ↑ feal.
- ↑ Ak. 10.26.
- ↑ azeuli.
- ↑ Dan. 8.28.
- ↑ diougan.
- ↑ xxxx.
- ↑ pen-kenta.
- ↑ diwez.
- ↑ Ian. 3.23.
- ↑ gadelezerien.
- ↑ steren.
- ↑ Ezai. 55.1. Ian 7.37.
- ↑ hep dale.
