ur barrad arnan dal, get aùél, luhed, gurun ha poulladeu deur ar boulladeu deur épad pedèr troiad orloj.
Ne oè ket, duhont, ur bod lann de zistaù dohton, ur harh de glah un dihlaù étaldi ; glaù ! glaù ! glaù !… deur ! deur ! deur !… un dihlann !
En ur gloah lagad éh oent bet glubet, straket, fankigellet ma oè ohpen un druhé ou guélet. Ne oè ket, ar ou hrohen, un huénen ha ne oè ket béet tèr guéh é léh unan.
Er gurun a pe oè didoroñnet, en nean digamoulet, hag er glaù dihañnet, é rekina en hantér groahed, en hantér plahed hoah muioh. Ivér é, pe vè er horv glubet ; ur péhed ne vè ket neoah.
Hañni anehè, é guirioné, ne hellè temal en aral aveit bout bet hé degaset édan en tarhad deur dal, get ur fal chonj. De guh-héaul, en anderù kent : rezi de gaer ; de saù héaul en deùeh : rezi de gaer. « Damb de vrechen, merhed ! » e larent ind unan d’en aral.
Perak sourein de rekinat, de échevéat ? Ne gavehent ket, én ou filordigeu, dén d’ou hujautal, d’ou bahatat…
Marsé, eùé, é vehè bet guel getè, aveit torrein ou fennad téroni, kavet unan benak de doroñnal, de hujautal ha de letat dohton ha marsé, ha marsé de… grabisat.
Sourein e hrent de rekinat. Perak ? Cheleuet en doéré get Fanchon.
« Ha nezé é vo ret demb trézein penhér Kerlokoal, édan fri klohour beboér er chapél, e vè perpet kafourchet ar é drezeu, de hortoz en doéréieu. Éh et de
