é ma duah eùé en Eutru Kuré de bredeg. É huirioné de beb unan.
« Marion ne houi ket hoah nag overennein na predeg na bout é ma ur voéz fur ha digor hé spered ; é ma er geu geti ha guel é dehi cherrein hé beg é léh garmal arlerh en Eutru Kuré hag e bredeg er huirioné.
« Péhed é ma fari Marion Kekah avelsé, rak ne vo ket kavet guel moéz egeti, na guel kalon. Ou anaùout e hran mé rah : Jekion Pepoul, Matoch Kabot, Fanchon Mouzen…
« Hama ! hañni anehè ne dosta de Varion, o nann ! Ur blankad « deur » é ma bet é rein dein hoah er mitin-men, ur blankad « deur » ag er blein, ag er boulh…
« Marion Kekah, honeh e zo ur voéz, ia, honeh e zo unan, èl hé iar…
« Maianna ! me moéz Maianna ! cheleuet hag é veet bammet, moézig a garanté. A pe oen mé, er hreisté-men, é tistern a davarn Marion, é ma deit duhont en toulladour Latira, a davarn Jekion Pepoul, de laret é ma klanùeit hé hog get en derhien vras, dré arben er goal aùél é ma bet é cherreh érauk iar Marion, digunér vitin. Honeh zo ur iar… èl hé mestréz ! »
Hag é talhè Pipi de doroñnat diar en ol dreuigeu kleuet de vitin, beta ken ne gleuè er hloh é tinsal d’er gospéreu.
Aben kaer nezé é saùè, é kemérè ul livr ha bout ne houiè ket lén, é tennè ur chudellad chistr fresk aveit glubein anchen é orglézeu, ha éh è ér mèz én ur
