Banbocherion santél Breih,
pedet aveidomb.
(L. Veuillot)
Un tad banbochour é bet Pipi Garaud. A vihan é ma bet banbochour ha banbochour é bet tré betag er marù.
En évaj ne virè ket neoah dohton a vout ur hristén mat, ur goaz a galon hag ur jau labour étré en deu sul, pé étré sul ha gouil. Rak Pipi ne vanbochè ket ar er pamdé, nameit d’er sulieu ha gouilieu.
Met a pe vanbochè é vanbochè ha goap ne hré ket. A zeùeh é vanbochè.
Er mitiniad e dreménè ér vorh hag en anderùiad én é diegeh.
A vitin é tè d’en iliz de bedein Doué épad un hantér-ériad e badè en overen ha goudé é chomé tèr pé peder ér é tavarn Marion Kekah de gleuet doéréieu ha neùétedeu er vro ha de évet blankadigeu « deur ».
Pèloh amzér é vehé bet chomet duhont de « zeuratat » é biroñnen kenevé ha kenevé…
Abalamor d’er « henevéieu » é tisternè doh tavarn Marion ardroieu kreisté, a pe vezè gouli é ialh ha bar é sah-kov hag a pe luskè en dé monet get é hent.
Pipi ne vourè ket balé doh tioelded en noz. Ne oè
