deverral get er heh Lanliron hag en dizuardein érauk er lézel de zistroein devat é dam Janton. Hag ind distroeit de gavet Lanliron.
Ne gavezant ket kin, en dé-sé, a hoari nag a zeverrans get Lanliron. Oeit e oè én hent, hemb gout d’er vechérerion. Met truhek é bet en treu goudézé get é Janton, a p’en dé bet distroeit d’é benhér.
A houdé guerso éh oè é voéz é vourboutat ar é lerh : « É doullad e zegaso hoah geton hiziù, er prei ! Gouiet e vè pegours éh a tré ; hañni ne houi pegours é tistro. En nihour é konzè a gousteléein é vehé bet ér gér aben kreisté ; guel e vehé bet dehon konz a greisnoz… pé a zevéhatoh…
Ha deit Lanliron én ti get é sam voteu hag é govad chistr.
Ha ean de ziskar é sam voteu, én ur zatouillat d’é voéz, ne hra van erbet anehon hag e gandalh de dourhellat ardro d’hé uéled.
— Ur blank hantér, er voéz, guel marhad é ma bet lézet genein pep ré boteu…
— Get deùéhieu sord-men é ma prénet deoh hou tachen é ber amzér ! Aveit pinùikat ne vè ket a bar d’er ré e gol ou deùeh hag e zismant deuzek pé huezek real aveit gounid, pé é sigur gounid ataù, tri blank ar ur marhad.
— Taùet, er voéz ; eih real hembkin, em es fondet, en ur lod get Lanliron, n’em boé ket guélet a houdé guerso, guerso.
