hra kavet anehè é toul é zor, hemb dismant amzér, hemb fondein blank erbet, étré moned ha doned overen er sul ; guel é get en oheh kol un deùeh ha monet de glah é dreu de Gemperlé.
— Difisturoh e vè er boteu duhont, er voéz, ha marhadmatoh.
— Huitelleu de glah digaréieu !
— Ne glaskan ket digaréieu, met un taul mat d’obér er marhadeu. Aben kreisté é vein deit éndro.
— Chomet de doulladein drézé betag en noz, hag héneoah, èl er Latiraed, hui e iei de zihor hou toullad de greu er moh.
— Kleuet, er voéz, ur mat onn bet de charéat chistr ; ne anaùan ket hañni tré dein azivout en doéré ; met n’hellan ket mui ha ne vennan ket mui. Kousteléet dohein é vein deit d’er gér aben kreisté, get mem boteu ?…
— Get un toullad chistr aben pé arlerh kuh héaul.
En trenoz, é ma Job Lanliron é marhad er boteu ; monet e hra ag ur bern marhadoureh d’ur bern aral, ha chipotal e hra ériadeu hag ériadeu dohtu.
Gounid e hra ur blank pé deu get é chipotereh hir, met cherreh e hra er virùidig ar un dro.
Neoah, me Job ne chonjè ket monet d’en davarn aveit hé distag ; ne venné ket kol é goustelé doh é voéz, ha ean aveit kemér en hent eit distroein d’er gér aben kreisté, divèu èl astel ioud é Janton.
