Gwenojenno ha hencho don,
’Lec’h alïes e red gedon,
Kleunio uhel ’tre ar parko,
’Lech kan an evn war ar branko !
O kas o zaout war ar maezio,
Pôtred vihan gant o sonio,
Sonio ken koant ma ve laret
Eo gant Ele ’vent richanet !
Mouez an hekleo ’barz an draouien
O tisrevel ar ganerien,
Ha mouez ar c’hi a renk harzal
An disteran ma klew trouzal !
Met deut breman da dal ar mor,
Eus an Argoad deut d’an Arvor,
Ewit gwelet ar gwagenno
O’n em zrailhan war hon aocho !
Neblec’h ar mor na sko ken gwaz,
Neblec’h muioc’h ne c’hoari vaz ;
Labour ’nevo c’hoaz da beilhet,
Roc’h Breiz-Izel a zo kalet !
Gant ar roc’h ze eo e savet
Hon zourio koant dantelezet,
Tourio uhel ’vel bizïed,
’Trezek an Env dalc’hmad troet !
Stank e kaver en Breiz Izel
Kroaz-venerez, iliz, chapel !
