Sioul ha sioulik takennou dour
A ruilh war he diouchod ken flour…
He zellou dous d’an nenv zavet,
Hi a ouel d’e muian-karet ;
D’an hini a laras d’ezi :
— D’it ma c’halon, d’in da hini ! —
An hunvre kaer na badas ket :
Galv-Doue an eus bet trec’het…
Tavit, paouezit da ouela,
Sec’hit ho taerou, o Tina !
Tinaïg, sec’hit ho taerou,
Doue a chilaou ho klemmou ;
Hen n’ankoua ket eur bedennig,
Hen na zilez ket eur goulmig…
