Adlennet eo bet ar bajenn-mañ
— 144 —
IEHANN
Sentet ou des.
SIMON-PIÈR
Ia sur, é kuitat er vanden
Hag é kemér un hent aral.
ANDREU e saù.
Eun ou des bet,
Me lar d’oh.
IEHANN
A betra ?
ANDREU
Eun a vout ranjennet
Ha taulet, get er Mestr, en ur prizon ; lahet
Kent pèl marsé, più houi ! Er mestr e zou groñnet
A zanjérieu muioh eit biskoah. Ret e oe
Kuitat bro er Juifed, fonabl hag hemp dalé,
Rak hun anemized brasan e zou ino
Arajet de zonet hemb arsaù ar hun zro.
Chetu petra merhat en des groeit eun dehé.
IEHANN
Men Doué, er vro hun es de drezein zou eué
Danjerus mat eidomb : er Samariténed
Ne veint ket guel en hur hevér eit er Juifed.
SIMON-PIÈR
Nann, mes é ma er Mestr genemb ; ni en héli
Ha geton ne zoujamb ket nitra na hañni.
