« E bro Leon, rag enez-c’hlaz,
« Gwech-all, e oant diskennet c’hoaz ;
« Kemend a c’hoad defant losket
« Ken a oa ar mor glaz ruiet.
« N’euz, e Breiz, na boden, na bern
« E-lec’h na gaver ho eskern ;
« Koun ha brini oc’h ho sachat,
« Glao hag avel oc’h ho c’hannat. » —
Arserien bro-Zaoz pa glevjont,
Gand estlamm arzao a rejont ;
Ker kaer ann ton hag ar c’homzaou,
Ken e oant bamet o selaou.
— Arserien Bro-Zaoz, leveret,
Skuiz oc’h eta, pa ehaned ? »
— N’ed omp ked skuiz, pa ehanomp,
Kouls ha re-hont, Bretoned omp ! —
Oa ked ho c’homz peur-lavaret :
— Gwerzet omp ! tec’homp kuit, potred ! —
Hag ar Zozon prim d’ho listri ;
Hogen na dec’haz nemet tri.
Er bloavez-ma mil-ha-seiz-kant
Hag eiz ouspenn hag hanter-kant.
D’ann eil lun a viz gwengolo,
Oa trec’het ar Zozon er vro.
Er bloavez-ma, evel a gent,
Ema int bet laket enn ho hent.
Evel eur bar grizil er mor,
Ar Zozon, bepred, enn Armor.
