Pajenn:Ar Prat - Mouez Reier Plougastell, 1905.djvu/89

73

nedelek ar glaouaer

VII

NEDELEK AR GLAOUAER

——

D’an Aot. Grignoux, Belek euz a Blougastell.

E koad Bokenal daou zen paour
A veve war bouez ho labour ;
Ho zi disterik, eul lochen,
A ioa savet war eur grec’hen.

Biskoaz den n’hen devoa klevet
Klemmaden gand hini ebed,
Ho daou n’ho doa nemed eur c’hoant :
Kaout da zevel eur bugel koant.

Goude beza pell braz pedet,
Setu eur bugelik ganet,
O tigas e ti ar glaouaer
Levenez ha dremmou seder.

Diwar neuze ar vamm dener,
Vardro ar c’hrouadur dister,
A veze gwelet noz ha deiz,
’Vel al labous wardro he neiz.