55
maro ar breur iann en eusa
|
An Ankou kriz gand he falc’h diremed,
A sko bemdez koulz a-dreuz hag a-hed…
Kerzet a ra dreist ar mor fuloret
Evel war zouar dre an hentchou kalet.
Morse truez nag evit tad, na mamm,
Beleg, pried, ganthan espernet tamm.
Menec’h devot, kerkoulz ha tud ar bed,
A rank d’ho zro mont da jomm er vered.
Setu, Breur, oc’h galvet gand Doue
Da ziskuiza hed an eternite ;
’Vit labourou inouuz braz ha tenn
Eur gurunen a luc’ho war ho penn.
E gwered koz parrez Sant-Evarzek,
Tost d’ar porched, en eur bezik meinek,
’Ma korf ar Breur o c’hortoz deiz ar varn ;
Plijet gand Doue dont en deiz-se d’her gouarn !
Bep sul, bep gouel, varlerc’h an oferen,
He vignouned a ielo ’n eur dremen
Da lavaret bep a De profundis
’Vit he ene… Lux luceat eis !....
|
————
