Lakit en eul litrad eol-debri eun dournad eus al louzaouen-man, lezit da drempa e-pad ei zdez, hag e reot eul louzou dreist evid ar skaotadurez, an trouc’hou, ar gouliou, an taoliou-heol heg ar goanvennou kignet. Lakit da vervi en eul litrad dour eun dournad kant-toull hag eun dournad nizarig, hag e reot eul louzou mad evit ar paz, ar berr-alan. Mad eo c’hoaz al louzou-ze da netaat, da burifia sac’h ar boued.
Pa viot taget gand ar paz, ar berr-alan, eva dour bervet war kaol, ha lakat war ar stomog eun delien pe ziou hep ken, tommet mad ouz an tan, a ra vad kenan. Pa vez gouliou en divesker, lakit eun delien kaol war ar gouli, met lakit an delien-ze e-pad diou eur da drempa en dour boriket a-raok. Eur palastr kaol a laz ar boan pa vezer gand ar boan izili, ar Remm, ar Siatik, ha drouk an hurlou. Eur bevans mad eo ar c’haol, met pounner d’ar stomogou.
Mad evid ar paz, ar berr-alan, ar ruzell, d’an dud o deus poan o troaza, poan en o avu, en o felc’h, rak lakat a ra da droaza ha da c’houezi. Bervi dour war ar bleuniou anezi, hag eva diouz an noz en eur vont d’ar gwele, evit c’houezi.
P’o devez ar vugale poan o kaout o dent, roit d’ezo eur tamm kaol-malo gwenn da chaokat. An daou Gaol-Malo a zo henvel o madelez.
Hon tud koz a verve dour war gwriziou teol pa veze kalet o c’horf, p’o deveze goradennou, pugnezi, heskedi, p’o deveze c’hoant da burifia o gwad. Evid kement klenved kroc’hen a zo, kemeromp Teol. An dud re lard evit treutaat, e c’hellan ober d’ezo eul louzou mad kenan, hep noazout d’o yec’hed. Nao louzaouen a lakan da ober va louzou, hag ar genta eo an teol frizet.
