Merc’hed Kergroaz
Selaouet hol, hol selaouet
Eur bâl ’so newez gomposet (bis)
Tiridi-tiridei, dei, dei, lam-toura
Toura tra la lei !!
Eur bâl ’so newez gomposet,
Da verc’hed Kergroaz ez eo grêt.
A zo grêt da verc’hed Kergroaz,
O vont en noz da c’hoari ’r vaz.
Treuzi reont diou ster, pe der,
’Tont d’ann nozwez da Draon-Maner.
En Traon-Maner p’int arruet,
N’eo ket da zansal ez int et ;
Êt int d’he gambr gant ann otro,
Da c’hoari ’n dinz hac ar c’harto.
N’oa ket ’n nozwez peurachuet,
Fortun ar merc’hed a oa grêt.
Ar merc’hed paour-man a oele,
Na gavent den ho c’honzolje ;
Na gavent den ho c’honzolje,
Med an otro, hennès a re.
’N otro lâre d’ezhe bepred :
— Tawet, merc’hed, na oelet ket !
Tawet, merc’hed, na oelet ket,
’Wit ho puhe na golfet ket,
’Wit ho puhe na golfet ket ;
Met oc’h enor na laran ket.
— Gwell eo ganin merwel mil gwech,
Ewit coll ma enor eur wech,
Rac an enor, pa ve collet,
Ewit arc’hant n’hen caver ket !
’Wit laket ’n taboulin tro kêr,
’N enor kéz na deu ket d’ar gêr.
Ha lost ar c’haz war ar min-glaz,
’N hini oar homan a oar c’hoas ;
Ha gar ar gazec war ma scoa,
Me ’m eus hi lâret ’wit netra ;
Ha lost ar big war an drezen,
Setu achu ma c’hanaouen.
(Mab Lucas).