Kloarek Laoudour (Bleuniou-Breiz)

Eus Wikimammenn
(Adkaset eus Kloarek Laoudour (II))
Mont d’ar merdeerezh Mont d’ar c’hlask

Oberennoù damheñvel pe handelvoù all zo ivez, gwelout Kloareg Laoudour.

Luzel, Souetr, Proux, Kervennic, Kersalé, Clec’h
Th. Clairet, 1862  (p. 69-88)


KLOAREK LAOUDOUR.
————


I.


Kloarek Laoudour a lavare
D’he vammik baour, eun deiz a oe ;
Grit d’in eur banne souben-lez
Ma’z int a-benn d’al leur-nevez.

Kloarek Laoudour a lavare
E Kervarzin, pa arrue :
— Deiz-mad ha joa barz en ti-ma,
Ar benn-herez, pelec’h ema ?

Ema varlaez, barz er gampr venn
0 kribat flour he bleo melen.
Klevit he c’han dous ha klemmuz
Evel hini ann eostik-kuz.

Kloarek Laoudour, it davet-hi,
Mar d-oc’h evit he frealzi.
—Deiz-mad d’ehoc’h, ma dous penn-herez,
Ho kalonik, hag hi zo ez ?

— Va c’halon-me a zo seder ;
Nag hoc’h hini, va zervicher ?
Dallit eur gador, azezet,
Deut da dal an tan da dommet.

—Ne azezinn na ne domminn
Mont d’al leur-nevez e fell d’in.
—D’al leur-nevez me ne d-inn ket,
Na vinn ket laosket da vonet.

Marc’hek Lambol zo’r leur-nevez,
A lar feteiz kaout ho puez.
Rloarek Laoudour ’vel ma klevaz
He gleze noaz a zic'houinaz

— Ma ve den ebarz en ti-me
Da virout ouz va dous ha me
Ne d-aimp hon daou d’al leur-neve
Me hen treuzfe gant va c’hleze.

He zad, he mamm ’vel ma klevjont,
D’ar benn-herez, e lavarjont :
— Diwisket ho proz ru brava
Ha gwisket ha proz limestra.

Gwisket ho prozik limestrek,
Krogit e kazel ar c’hloarek,
Ma laro an dud dre ar vro
Ez a al Laoudour d’ar maro.

II.


Marc’hek Lambol a lavare
Barz el leur-nevez en deiz-se :

— Me vel Laoudour o tont a-bell,
Ar benn-herez ouc’h he gazel,
Ar benn-herez a Ger-varzin,
A gousko en noz-ma gan-in.

Kloarek Laoudour a lavare
El leur-nevez pa arrue :
— Pelec’h ema ar zonerien
Ma sonint d’in eun aubaden.

Ma sonint da gloarek Laoudour
A roï d’ezho bep a loeiz-aour.
Ma sonint an dro hag ar bal
Ma’z inn gant va dous da zansal.

Marc’hek Lambol a respontaz
Da gloarek Laoudour p’hen c’hlevaz :
— ’Vit da zansal n'ez afet ket,
Da c’houren ouz-in e teufet.

Ar c’henta ac’hanomp a gouezo,
Biken ac’hane ne zavo.
Kloarek Laoudour a respontaz
Da Varc’hek Lambol p’hen c’hlevaz ;

— Pa hoc’h eus-hu ma goulennet
N’oc’h ket da veza refuzet.
N’oc’h ket da veza refuzet ;
Penn-herez va manch d’in chachet.

Marc’hek Lambol, ’vel ma klevaz
’N eur c’houitell arc’hant a c’houezaz.
’N eur c’houitell arc’hant a c’houezaz,
Triouec’h den-chentil ’n em gavaz.

Triouec’h kleze zo dic’houinet
Marc’hek Lambol an naontekvet.
Ar benn-herezik a ouele ;
Ne gavje den hi frealje ;

Ne gavje den hi frealje,
Met ar e’hloarek, hennez a ree.
— Tavit, Naik, na ouelit ket,
Rak c’houi n’ho pezo drouk ebed.

Rak c’houi n’ho pezo drouk ebed
Nag ho tous kloarek ken-neubet ;
Kloarek Laoudour a zo potr mad
Pa gass he vestrez d’an ebat.

N’oa ket he c’her peur-achuet,
Marc’hek Lambol en deuz lazet.
Marc’hek Lambol en deuz lazet
Ha seitek euz he gonsorted.

III.


Kloarek Laoudour a lavare
E Ker-varzin pa errue :


— Chetu ho merc’h iac’h ha divlamm
’Vel pa oa ganet gant he mamm,
Kloarek Laoudour a lavare
D’he zous ar benn-herez neuze ;

—Va dousik koant, n’hen nac’hin ket
Ho kuitât brema a zo ret.
Ret vo mont beteg ar roue
Da gaout goaranti d’am buhe,

IV.


Kloarek Laoudour a lavare
E lez ar roue pa arrue :
—Dematoc’h, roue ha rouanez,
Me zo deut iaouank d’ho palez ;

— Petra a nevez ec’h euz gret
P’oud deut ker iaouank d’hor gwelet ?
— Marc’hek Lambol am euz lazet
Ha seitek euz he gonsorted


Ha seitek euz he gonsorted
O klask diouall brud va fried.
Pried d’in n’eo ket c’hoaz brema
Mes ’ma var ar poent da veza.

Roue Bro-C’hall en deuz laret :
— Gwir a-walc’h eo ec’h euz lazet,
Rak bez’ am euz en da eneb
Meur a lizer holl heveleb.

Ha kent ma’z i euz al lec’h-se
Ez pezo kollet da vuhe.
— Kloarek Laoudour, c’hoari rafet
Eun taol c’hoaz ouz va zoudarded ?

— Ia, digaset-ho d’in er porz,
Pa ve hanter-kant, ne rann forz.
Kri vije an den na ouelje
O welout e porz ar roue


Goad ar zoudarded o ruia,
Kloarek Laoudour oc’h ho laza !
Roue Bro-Chall a lavare
D’he bachik bihan en deiz-se :

— Skrivit d’ezhan var baper gwenn
Ec’h hell bale e pep tachen ;
Skrivit d’ezhan var baper glaz
Ec’h hell bale evel eur goaz.

Kloarek Laoudour a zo potr mad
Pa gass he vestrez d’an ebat.


————