Ketan guéh ma on bet
E Kelùen beniget,
N’em boé hoah nameit deuzek vlé.
En dé kent er pardon e oé.
Ag hun parkeu bamdé
Na liés em boé guélet
Duhont ar er mañné
En tour bras ihuél saùet !
Me zad er mitin sé
Kentéh él goleu-dé
En doé men dihunet
Ha d’ein nezé laret :
« Me mabig, arhoah é ma
Gouil en Intron Varia
Kerhet enta de govésat. »
Ha mé reskondet : « ia, me zad »
D’er vorh a pe oen é monet,
Me huél én un taul tour Kelùen.
Me chom un herrad de sellet
Ha deit ember er chonj ém fen
De grapein betag chapél
En Intron, me mam santél.
E Sant-Nikolas arriùet
Hent erbet ne houien mui,
Mes ur voéz goh em es kavet
Ha mé goulennet geti
En hent de Geluen beniget :
« E han mé de Gelùen eué,
Emé hi, damb hun deu kevret. »
Ur gristenéz gredus e oé
Epad en hent n’arsaué ket
A zeviz d’ein ag er Huerhiez
Ag ol er gréseu présius
E reseu eit-omb ker liés
Get hur Salvér, hé mab Jézus.
Chetu ni é lann Kersulan
Ha nezé chapél en Intron
E huélamb get er joé vrasan.
— « Er leh men er berhinderion
» E stoui de saludein Kelùen,
E lar d’ein me hansortéz,
» Ar hun deulhin koéhamb aben
» Eit saludein er Huerhiéz. »
Hag hun deu kosté ha kosté,
E laramb get ur memb kalon
« Ni hou salud, o mam de Zoué
Pedet eit-omb keih péherion. »
Hag en um lakamb de gerhet.
En hun dehorn er chapelet
Betag lein er manné santél,
Betag en nor ag er chapél.
O péken eurus e oen mé,
Pe oen en iliz deuhlinet
E pedein get ur gred neué
En Intron vat, me mam karet !
Kentéh kuré Kelùen
E za doh én autér.
Me gleu en overen,
Hag un nebed amzér
É choman hoah de batérat
Erauk ma hellan kovesat.
Mès é hortoz ne chuéhen ket,
Ker bourus ma kaven perpet
E pédein dirak en Intron.
Ben un herrad goudé
É reseuen èr gommunion,
Me Salvér ha me Doué.
Biskoah n’em es ankoéheit,
Goudevèh ém buhé,
Er gommunion em boé groeit
É Kelùen en dé sé.
A nehi em es goarnet
Ur chonj lan a zoustér,
Rak énni em boé kavet
Nerh, konfort ha sklerdér.
Duhont de barkeu Kerhoret
Mal e oé monet èndro.
Dirak en Intron deuhlinet,
Me lar dehi kenavo.
« Kenavo d’oh, o Guerhiéz glan,
« Chetu me hetan perhinded
« Met ne vou ket men devéhan :
« Me zei hoah liès d’hou kuélet
« O Intron a Gelùen,
« Cheleùet me feden :
« Ag er bed-men lan a dristé
« Pe vou galùet m’inean,
« Groeit ma hein d’hou kuélet eùé
« D’hou paléz ag en Nean ! »
|
