|
1
Get en éled ér Baradouéz,
Kañnet ar en doar, kristénion,
Gloér hag inour de Sant Franséz
E oé ken ízél a galon.
En ur vélein é vertuieu,
Kerhamb eùé ar é bazeu.
2
Dirak eskob Assiz un dé
Franséz, get ur gred berùidant,
Eit choéj hemb kin er beuranté
E ziléz memb è huskemant.
Peur a spered biùet bamdé,
Eit bout pinùik a vadeu Doué.
3
Franséz e ia get truhégeh
De chervij tud lovr ér hlandi,
Ha kuhet émesk er ré geih,
Burhudeu e hra muioh-mui,
D’er peur hou torn mar astennet
Get Doué é véet sekouret.
4
Nen des a nehou vad erbet.
Neoah ataù lan a fians.
Aveit en urh en des saùet
Ne ven meit harp er Brovidans.
El dou fiet én Eutru Doué,
Ha ean hou sekourou eùé.
5
Ur règl santél reit d’é venéh
E zou labour er Spered-glan,
Hag er Pab hé aprov kentéh
El unan ag er ré guellan.
Er Spered santél e ra sklerdér
D’en neb e gar en digemér.
6
Hanùein e hra er beuranté
Guir vageréz é urh santél.
« D’hé harg, e lar ean, kredet mé,
De verùikin e vou fidél »
Mar biùamb ataù revé Doué,
Nitra ne vankou d’emb eué.
7
Ne ven mui bout mestr d’é venéh,
Rak kentoh sentein e garé,
Ha tremén é vuhé abéh
En izélded, ér beuranté,
Mar vennet un dé bout salvet
Seùel ihuél ne glasket ket.
8
Er labourieu izél, kalet,
E oé guellan getou gobér ;
Prest e oé de sentein perpet
D’en distéran ag é vredér,
D’hobér brezél d’er brasoni
Lakamb ataù ol hun studi !
9
Hantér gusket, soufrein e hra
Get en tuemdér, er iénion ;
Mes doug er groéz, chetu petra,
E hoanta hemb kin é galon.
Ha mé, ne glaskan, tro en dé,
Meit bout eurus ha lan a joé !
10
Eit kemér skuir doh hur Salvér
En doé iunet deu-uigent dé,
Franséz, ér brasan diovér,
Pad er hoareiz e iun pep plé.
Groeit eùé, d’en déieu merchet,
Ol er iunieu gourhemenet.
11
Izél a galon ean e gred
E ma ur péhour a drest par,
Ha ean e ven bout disprizet
El er fallan dén ar en doar.
Ha mé neoah, ur guir péhour
Ne glaskan ataù meit inour !
12
Dareu huerh e skuillé un dé
Ar é béhédeu treménet,
Pe zas dehou kleuet get Doué :
« Franséz, ol é mant pardonet. »
Doujamb ataù, ne houiamb ket
Mar dé hur fauteu diverchet !
13
Un dé aral ma oé tantet
Get Satan, dré chonjeu méhus,
Aveit pellat er goal spered
Ean um daul ar en erh klasus.
Chonjamb én ihuern hag én Néan,
Aveit chom glan korv hag inean !
14
Brezél e hra er heh Franséz
D’er bed lorbus e ven er hol ;
Um stagein e hra d’oh er groéz
Revé aviz en Apostol.
Goaskein hemb arsaù e zou ret
Ar er galon, ar er spered.
15
Gellein e hra laret eué
E guirioné, ne viù ket mui,
Jézus e viù énou bamdé,
E ma Jézus doh er hondui.
O Jézus, hui é me guir roué,
Biùet énan, konduiet mé.
16
Pe vé groeit dehou rebrécheu,
Ean ou hemér a galon vat,
E kontrél, er mélasioneu
E hra donjér dehou dalhmat.
Ha mé, p’um huélan disprizet,
N’hellan parrat a vout chifet !
17
Neoah ean um blij guéhavé
A vout mélet, a vout karet ;
Mès mélasion ha karanté
De Zoué ean ou henig perpet.
Elsé de Jézus keniget
En inourieu e reseùet.
18
Ean hourhemén d’é vugalé
Ur vuhé lan a santeleh
Er benijen, er garanté,
Er beden, er iun, er guir peah,
Rag er beuranté a spered
Pèl doh trouz ha safar er bed.
19
Perpet é ma lan a zoustér,
Amiabl, biskoah tinèroh,
Hag é kevér ol é vredér
N’hel ket boul karantéusoh,
E Franséz, limaj hur Salvér
En ol vertuieu e huélér.
20
Deustou mé ma lan a zoustér
N’hel ket andur er honzeu fal,
Hag aben e tisko bout tér
Pe hoal-gonzér ag er réral.
Konzet mat ag ol hou predér
Hemb cheleuet er goal gonzér.
21
En ofis e lar en é saù
Hag é bén ataù diskabel,
E chonj tréma Doué hemb arsaù
Ha berùidant él un arhél.
Groeit ma chonjein énoh, men Doué,
Eit ma kreskou me haranté.
22
« Men Doué, me ol vad », er gonz-sé
E laré ataù hemb skuéhein,
Doh hé laret é tremené
Nozieu abéh én ur bedein.
Eit pedein mat en Eutru Doué
Karet ean, ha treu erhoal é.
23
Pe chonj Franséz én Doué gañnet
Ha deit de vout kroédur bihan.
Kentéh é galon, é spered
E zou ér leuiné vrasan.
Karet eué, inean kristén,
Un Doué eitoh deit de vout dén.
24
Deulhinet dirak en autér
Get ur garanté berùidant,
Adorein e hré hur Salvér,
Un Doué kuhet ér Sakremant.
Get fé biù, adoret eué
Jézus, magadur hous iné.
25
Drougeu é Salvér beniget
E hré dehou er brasan gloéz ;
E galon oé deuhantéret
A p’um gavé doh treid er groéz.
Ha ni, ne véemb ket touchet
Dirak hun Doué eit-omb marùet ?
26
Goulieu é Salvér karet
E zou en é chonj noz ha dé
Hag en é gorv é mant merchet
Dré ur mirakl kaer aberh Doué.
Chonjamb é goulieu Jézus
E zou marù eit-omb, tud kablus.
27
Er Portionkul e zisko reih
Penaus Franséz e oé bamdé
Gredus avei salvedigèh
En dud prenet get goèd un Doué.
Goulennamb get Doué a galon
Ma tistroeint, er geh péherion.
28
Pégement é karé Mari,
Er laret d’oh n’hellehen ket,
Hag é garanté aveiti
E venné strùein dré er bed.
Karet Mari enta perpet
En neb hé har, n’um gollou ket.
29
D’er pab ha d’en ol eskobed,
D’er rouañné ha d’er véléan
Franséz e oè sentus perpet
Betag é dermén devéhan.
A galon vat sentamb eùé
D’er ré e gonz d’emb aberh Doué.
30
Gouni e hra é bredegeu
En ineañneu aheurtetan ;
En diaul e lam ag er horveu,
Er iéhed e hra d’er ré klan.
Damb devat-ou én hur drougeu :
Cheleu e hrei hur pedenneu.
31
Pe oé é predeg d’en éned,
Er rémen er cheleué mat ;
Pe gonzé eùé doh en oéned,
Ind e senté doh-tou dalhmat,
Hag er hristén, ur souéh alkent,
Doh é Grouéour e zou disent !
32
D’er honfortein én é glinùed,
Un él oè deit a lein en Nean ;
Ha chetu er sant é kleuet
Ur muzik ag er ré kaéran.
A pen d’omb ér vrasan tristé,
Doué e ra d’emb konfort ha joé.
33
Kent merùel, Franséz dirak Doué
Pardon get é gorv e houlen
En dout er lakeit hemb truhé
D’hobér kement a benijen.
Kentoh, allas ! hur bou ni ké
Hur bout hur horv mignonet ré.
34
Ré hir e vehemb d’emb laret
E obéreu pad é vuhé.
Ataù é ma bet hed ha hed
Limaj biù hur Salvér, Mab Doué :
Ou deu é mant èr hreu gañnet
Hag ou deu ar er groéz marùet.
35
Get Doué p’en des kleùet laret
E ma deit é ér devéhan,
Ker bourus é en neùéted
Ma varù é kreiz er joé vrasan.
Biùet mat tré ma oh er bed,
Hag er marù ne zoujeet ket.
36
Sant bras, get fians hou pedan
Tré ma viùein, sekouret mé
Eit ma hein, én ér devéhan,
Devat-oh de ranteleh Doué.
Marù doh er bed hag é joéieu,
Revou en Nean ol me chonjeu !
| 
