Simon
Damb ar un dro de Vethléem, (bis)
Rak duhont é hès gañnet d’emb,
En nihour devéhan,
Mabig en Eutru Doué ean memb
Dichennet ag en Nean.
Julian
Damb aben kaèr, mem brér Simon, (bis)
Na joéiuset é me halon
E kleuet kement-sé !
Mès petra omb ni, bugulion
Eit guélet mab hun Doué ?
Allas ! tud peur omb ni meurbet.
Peur a vadeu, peur a spered,
Eit konz get guirioné.
Er Hroèdurig, mestr ol er bed
N’hur sellou ket marsé.
Stevan
Arsaù a gonz elsé, Julian,
Poén en des er Hroèdur bihan
E kleùet te gonzeu.
Mab Doué get en hirèh vrasan
E glask ur haloneu.
Guir è lares é omb tud keih.
Més Mab Doué lan a vadeleh,
Ha lan a garanté,
En des lausket é ranteleh
Eit choéj er beuranté.
Er ré distér, er ré peuran
E zou karet getou guellan,
Revé ma chonjan mé,
Rak ean en des um hroeit bihan
Eit bout hanval doh-té.
Tuchant é ma deit en Eled (bis)
De laret d’emb en neuéted :
Gannedigèh Jézus,
Eit ma héemb ol d’er guélet
Get ur galon joéius.
Ol er Vugulion
Te lar er huirioné, Stevan. (bis)
Damb ar un dro keti-ketan
D’er gér a Vethléem,
Damb de huélet er Mab bihan
E zou degaset d’emb.
Léon
Un dra benag e larein mé, (bis)
Mar me lausket de gonz eué,
Cheleuet, mem bredér !
Ur predeg kaer d’er Hroédur Doué
E garehen gobér.
Me larou d’er Mabig karet
Er chonjeu lakeit ém spered,
Chonjeu deit ag en Né,
Rak me unan n’hellehen ket
Kavouit er chonjeu-sé
Matau
Te houér predeg enta Léon ! (bis)
Ama revou d’is, mélasion !
Mès guélamb un tammig
Guélamb mar konzes a féson
Dirak er Hroédurig.
Léon
Dirak-tou pe vein dégoéhet, (bis)
E rauk ma larein gir erbet
Me daulou me bonet
Ha me zeulhinou get respet
Eit bokein d’é zeu droèd.
Arlerh me saùou liant mat, (bis)
En ur dorchein men deulegad,
Rak me ouilou get joé ;
Ha me larou bet un herrad :
« Deueh mat d’is, men Doué !
« Me gred é ous é guirioné
« Er Mestr hemb par, en Eutru Doué,
Mab en Tad éternél ;
Ha neoah dén él on eùé,
O kroédurig santél !
En doar a houdé pear mil vlé (bis)
Get un hireh vras e horté
Salvér en dud kablus.
Laramb ol bremen trugèré :
Chetu gañnet Jézus,
Perak, o Jésus beniget (bis)
En ur léh peur é ous gañnet,
En ur hoh marchausi ?
Er logeris vilan ér bed
E zou reit d’er Messi !
Eit golein te vampreu tinér (bis)
Nen dės nameit tammeu mihér.
Na braset peuranté !
Hag un ofen, o me Salvér,
E zou hoah te hulé !
Bremen é ma iein er gouian (bis)
Ha kaer é bout étal en tan
E tuemmet azéet ;
Aveitous-té, mem brér bihan,
Nen des uéled erbet !
Er Roué Hérod e zou kousket (bis)
En é baléz a eur karget ;
Mès amen, o men Doué,
Me huél ar er plouz astennet
Mabig er brasan Roué !
Perak enta, Roué er Rouanné, (bis)
E tes choéjet er beuranté,
Choéjet er mizérieu ?
Te zou mammen en ol dañné.
Mammen er guir joéieu.
O Kroédurig, dous èl un oén, (bis)
Bremen é komprenan hemb poén
Perak é ous ér hreu,
Perak é ous deit de vout dén
E kreiz er soufranseu.
Deit ous ér bed-men a dristé (bis)
Eit diskoein d’emb te garanté.
O Jézus, guir Messi,
Eit ma véemb hanval d’is té,
E ous hanval d’emb ni.
Kenevé ous é oemb kollet, (bis)
En ihuern e vehemb koéhet ;
Mès, o Jézus bihañ.
Ar en doar é ous dischennet
Eit hur seùel n’en Nean.
Penaus é larein trugèré ? (bis)
O me Salvér, me garehé
Rein d’is un donézon ;
N’em es chet argant na dañné :
Me ra d’is me halon.
Rekis é bout kalet èl mein (bis)
A pe chomér hemb te garein,
O Doué karantéus.
Aveit-on mé, tré ma viùein.
Me garou me Jézus.
Più ár en doar e viùehé (bis)
Hemb istimein er beuranté,
Hemb disprizein er bed,
A pe huéler Jézus, mab Doué,
Ken izėl dichennet ?
Bremen é rauk monet d’er gér, (bis)
Kenavo d’is, o me Salvér,
E laran get ankin.
Etal ous bourus é kavér
Chemel eit berùikin.
Ol er Vugulion
Te houér predeg èl ur person (bis)
Konz aveit-omb enta, Léon,
Dirak er Hroèdur-Doué :
Nen des chet bugul ér hanton
Ken abil èl ous-té !
|
