I
Louizon, me hoér karet,
En dé-men zou diméet
Ha d’er fest è oh pedet,
Hui, kérent hag amied.
Sonnamb ol, soñnamb get joé,
En dé-men a leùiné.
II
En inour de Louizon
Me gleu er binieu é son.
Chetu hi plom é tonet,
Kazaliet get hé fried.
Soñnamb ol, soñnamb get joé,
En dé-men a leùiné.
III
Ur guen-hoarh ar hé géneu,
Hi gerh arlerh er binieu,
Hag en dud e lar dehi :
« Louizon, eurus oh hui ! »
Soñnamb ol, soñnamb get joé,
En dé-men a leùiné.
IV
Un dro krol ar er hlazen
E vé groeit é rauk miren.
Louizon get hé fried
Liant mat e saù en troed.
Soñnamb ol, soñnamb get joé,
En dé-men a leùiné.
V
Tud iouank, mal é dichuèh ;
Doh en daul keméret léh.
Deit de glask hou lod chervad,
Bout zou treu mat de lipat.
Soñnamb ol, soñnamb get joé,
En dé-men a leùiné.
VI
Chistr milén, kaer é huéren,
Souben dru ha bara chuen,
Get kig berù ha kig rostet,
Kafé huék ha kaud sukret.
Soñnamb ol, soñnamb get joé,
En dé-men a leùiné.
VII
Arlerh pred, er sonnerion
E gleùér ataù é son ;
Ha ne vou ket kavet ré
E sonnou ker brau eldé.
Soñnamb ol, soñnamb get joé
En dé-men a leùiné.
VIII
Er bombard hag er binieu
E ra joé d’er haloneu :
Ol en dud, bras ha bihan,
E ven krol keti-ketan.
Soñnamb ol, soñnamb get joé.
En dé-men a leùiné.
IX
Get kement a leùiné
Bean é ma paset en dé,
Ha chetu deit en noz du,
Pep unan e ia d’é du.
Soñnamb ol, soñnamb get joé,
En dé-men a leùiné.
X
Més érauk d’en neu bried
Kenavo zou ret laret.
Kenavo, bredér karet,
Revou Doué genoh perpet !
Sonnamb ol, soñnamb get joé,
En dé-men a leùiné.
