Er Jardrinour hag er Vugalé
————
|
Ur Jardrinour d’é liorh-fréh
En doé galùet bugalégeu ;
Ne oé kaèroh, bourusoh léh :
A bep tu gué get ou bareu
Goleit ag avaleu milén
Ha gué karget a bér eùé.
Er Jardrinour n’en des chet poén
E lakat ol er vugalé
De grog èr pér, én avaleu.
« Keméret, dèbret, e lar ean,
Mes hemb kargein hou fichedeu.
E mesk er bautred bihañnan
Bout oé unan e daulé fréh
Ardrest er harh liés a huéh.
Getou e vé goulennet bean
Perak é hra en hoari-sé :
« En tu ral er harh, émé ean,
Chetu fréh e gavein goudé »
Get er gonz-men er Jardrinour
E zou én un taul sklerdéret.
Deit chonj dehou ag er labour
E zou d’hobér eit bout salvet.
Ha ean oeit ha laret kentéh :
« Me hrei eit me salvedigeh
El m’en des groeit er pautrig fur
Eit é vad hag é blijadur. »
Ha goudéveh, pad é vuhé,
Elsen e hras é guirionné ;
Gobér évreu mat muioh-mui
E oé bandé ol é soursi.
Arlerh peb unan anehé
Ean e laré én é spered :
« A drest garh « en éternité »
« Chetu hoah ur fréhen taulet,
« Ur fréhen e gavein goudé,
A pè vein arriù dirak Doué. »
|
————
