Ur héh blei e oé ken tret
Ma oé séh él un tam koed ;
Ne oé meit éskern ha krohen
Goleit get ur vil a bañnen.
Er blei-men e gav un dé
Ar é hent ur pikol ki
En doé téhet de valé
Er parkeu pèl doh é di ;
Lart e oé, biskoah lartoh
Hag ur bannen flour dehou.
Chonj er blei, nitra suroh,
E vehé bet krog én nou
Hag er lakat a dammeu.
Mes ean en doé eit um zihuen
Dent luem én é chajelleu.
Er blei enta, soublet é bén,
E ia de gavet er hi.
« Eutru, na gaillart oh hui !
E lar ean dehou get respet.
— « Ker gaillart él-on mar karet
E véet, e reskond er hi.
« Kuiteit hou koėdeu, rak énné
« Ne gavér meit poén, melkoni,
« Kerteri liésan eué.
« Pegement ag hou kansorted
« E dremén ur vuhé kalet
« Ha ne gavant bouid de zèbrein
« Nameit hemb arsaù é skrapein !
« Deit genein mé, m’er lar d’oh,
« Ha hui vou kalz eurusoh. »
— Mes pétra um bou mé d’hobér ? »
E lar er blei. — « Labour distér,
E mé er hi, harhal de noz,
« Pe vou en dud get ou repoz
« Eit goarn en ti doh er laèron.
« D’er mestr ha d'er serviterion,
« Mar a huéh én dé, gobér chér.
« Hui hel bout sur ér féson-sé
« Hui e gleuou konzeu tinér
« Hag hou koalh a friko eùé
« E vou tollet d'oh de zèbrein. »
Er blei, e kleùet kement sé,
Get joé n’hel parat a ouilein.
E vonet get en hent nezé
Ean huél goug é gansort kignet.
Petra é en dra-men ? émé éan,
— Nitra. — Laret d’ein, mé hou ped !
— Marsé er chalen e zougan
E zou kauz d’er péh e huélet.
— Staget oh enta, mar a huéh,
E lar er blei, ha n’hellet ket
« Duhont, dumen ridek dalbéh
« Na monet, d’er léh ma karet ?
— Naren, mès ne hran forh erbet.
— Ama guèl é genein mé
Eit friko me liberté.
Ne garehen ket hé hol
Memb eit kavet un trézol. »
Ha hemb ar é lerh sellet,
Oeit er blei éndro d’er hoed.
