Fæçon d’examinein er-ré e fal dehai bout receuet én Urh
1.°
RÉ er garanté hun nès doh en Urh a benigen, ha dré en désir hun nès de reih dehou er græceu cairran ha d’er hresquein pé d’er strêhuein gùel-ar-ùel, ni e ordrén ma vou abroguet, a zivout er fé catholiq hac en aboeissance deliet d’en Ilis, er-ré e vou galhuet de héli er stad-cé ; ha mar bai cavet é talhant a zevri doh er fé-zé ha doh en aboeissance-zé, é vou guellet ou receu é surté.
2.° Ret-é dihoal guet er brassan sourci ne vehai receuet én Urh-cé na huguenaudet na tud suspectet de nahein ur poént benac ag er fé, nac ehué er-ré e zou diffammet én ur mod benac.
3.° Mar bai bet receuet unan-benac ag er sort tud-cé dré sompren, é veint taulet ér mæz ha dénoncet d’en Inquisition eit ma vou groeit ou frosæz. »
Er chapistr quetan-men e lar tri-zra : péh sort tud e ellér receu én Urh a benigen, péh sort tud ne zeli quet bout receuet, ha péh sort tud e zeli bout taulet ér mæz ag en Urh. Ellein e rér receu abarh en ol Grechénion e vihue santélemant ; ne zeliér quet receu en huguenaudet, en dut libertin, en dut scandalus, ha memb deliein e rant bout taulet ér mæz, mar dint bet receuet dré sompren.
El ma oai sant Françæs un dén apostoliq én é greden hac én é obéreu, ean en dès ehué groeit é bossibl eit laquat é calon é vugalé er burtæd a fé hac er santeleah a vuhé. Er Sant-cé, ambraset guet er flam a garanté Doué èl ur Séraphin ag er Baraouis, ha desquet guet Doué, é ouyai raih penaus ér hettan paz e rér eit tostat de Zoué e zou credein én ou pé ér fé [1] ; é ma er fé er fondæzon ag er salvedigueah [2], buhé en dén santel [3], consolation er-ré e ra penigen [4], retirance er behérion [5], alhué er Baraouis [6], scont en ihuern [7], reparourés el ligné humen collet [8], ha penaus hemb er fé n’ellér quet pligein de Zoué.
Mæs ean e ouyai ehué penaus er fé, eit méritein en titreu inourabl-zé, e zeli rein sclerdér d’hun speret, caranté d’hun halon ha nerh d’hun hourage. Er fé e zou ur flambeüen, emé sant Pierre, e zeli rein sclerdér demb é creis en tihoueldæt ag en huguenaudage ha trompereaheu, bet que ne vehemb antréet abarh er splandér ag en éternité. Er fé e zou, emé sant Ambroès, mam en ol vertuïeu, rac ag er fé é sahuant, hac er fé ou mâh. Er fé e zou, emé sant Paul, ur huirasse hac un armage terribl e ra demb feahein hun anemiset ; mæs necessær-é ma vou hun fé general, apert ha courajus.
Hou fé e vou general, mem berdér ha hoéreset quaih, mar doh instruget mad ag er péh e zeliet credein, ha mar credet ferm en ol poéndeu ag er fé e ansaign en Ilis d’hé vugalé. Hou fé e vou apert, mar rescond er santeleah a hou ç’obéreu d’er burtæd a hou fé, ha mar justifiet er ùirioné a hou creden dré ur vuhé dibéh. Hou fé e vou courajus, mar beah gùélet é héli hac é tihuen er fé, querclous dirac er grechénion yein ha digaz èl dirac en huguenaudet hac er bayannet ; ha mar credet é hoh quen obliget de ziscoein er fidélité hac er respect e zeliet de Zoué dirac en dut libertin, èl ma oai er Vartyret obliget d’ou discoein dirac en tirandet ; hac èl ma oai gùel guet er Sænt courajus hont andur peb sort tourmanteu, eit désavoéein é hoent Crechénion, èl-cé é teliet discoein guet courage vras e peb occasion é hoh disciplet ha serviterion veritabl de Jésus-Chrouist, hac é ma gùel gueneoh gobér é volanté eit en ol madeu e glasquér, pé eit miret doh en ol drougueu e zougér ér bed-men.
Chetui en obligation hinourabl e hoès queméret ér Vadient, hac e zeliet hou pout reneuéet é quemér en habit ag en Urh, a pe ne zeli bout receuet hanni a vihannoh ne vér assuret é ma fidel hac aboeissant d’en Ilis catholiq, apostoliq ha romæn.
Ellein e rér hanàuein quement-cé pé dré er réputation publiq en dès en hani e oulen en habit, penaus é vihue santélemant, pé dré en testoni e rant ag é fé hac a é vertu en dut vad en hanàu, pé dré en examén particuliér e ra ag é vuhé hac a é greden en Directour, Supérior pé Supériorés ; ha discretet, a p’en n’hanàuér quet a hènd-aral, eit goud a ean e gondui ur vuhé scandalus, a ean en dès groeit ur faut considérabl capabl d’obér col en hinour, a ean e ra un trafic benac dihuennet, a ean e zou divlam é vuhé, a ean en dès un himur diæz, caignus pé attahinus, perpet é clah changemant, pé é oal gonz, etc. Mar gouïér é ma en hani e oulen en habit sujet de unan-benac ag er scieu-zé, é teliér er rufuse guet eah a gaingein en yvrai guet er grén mad, guet eah a gouciein, guet compagnoneah infâm en dut vicius, un Urh ne zeli en dout meit tud santel, hac e zeli discoein d’en ol en exampl ag ur vuhé devot.
Mar arrihue guet unan-benac ag en Urh couéh én huguenaudage, pé él libertinage, pé én ur vuhé hemb religion, èl n’en dé quet établisset en Inquisition é France, é vou avértisset en Directour, hac en Directour e avertissou é particuliér en hani en dès dobér de changein a vuhé, ha goudé ean en avertissou dirac unan-benac pé dirac estroh eit unan ag er verdér pé hoéreset, ha ma ne dèn quet pourfit ag en avertissemanteu carantéus-cé, é vou disclæriet ér guetan assamblé taulet ér mæz ha distaguet doh en Urh.