Epilog ann dez kenta a Zantez Triphyna

Eus Wikimammenn


Epilog ann dez kenta a Zantez Tryphina


skrivet gant Fañch an Uhel


Kendalc’h keltiek etrebroadel
Sant Brieg 1867




EPILOG


Ann dez kenta


A ZANTEZ TRYPHINA.


Gant F.-M. ANN UHEL.


————


Aotrounez hag Itronezed,


Deut a bep-tu wit bon gwelet, —
Ha c’hui, breudeur ker a vro-bell,
’Zo diredet da Vreiz-Izell,

Hag oc’h euz bet treuziet ar mor,
’Wit gwelet ho mamm-goz Arvor,
Me a deu d’ho trugarekad,
’Wit ho karantez, ho ioul-vad.

D’ac’h-holl e lavaran : Bennoz !
Bugale, re-iaouahk, tud-koz,
Eskop zantel, tud a iliz, —
Mewel, oberour ha bourghiz.

Ha c’hui, tudou diwar ar mez,
Trugare ’wit ho madeles,
Rag c’hui hon intent hag hon c’har,
Hag hon anvez iwe, hep mar.

Ar pez bon euz diskoet ama,
Euz a vuhez-gaer Triphina,
Mezelour da holl vroage Breiz,
’Zo leun a fumez hag a feiz, —


N’eo met ewit rei d’ec’h ar c’hoant,
(Neubeud po ezom a arc’hant,) —
Da dont da glewet penn-du-benn
Eur pez ar c’haera ’oufec’h lenn

Deuit ta warc’hoas d’hon gwelet,
C’hoarzinn ha gwela a refet ;
Met bezit leun a vadelez
Ewit hon faziou, tudou gez.

Bet’zo un amzer, n’euz ket pell,
’Weljac’h dre-holl en Breiz-Izell
C’hoari hevelep mysteriou,
War-ar-meas, koulz hag er c’heriou.

Ha na garfac’h-c’hui ket gwelet
Ar c’hiz-koz se o reen bepred ? —
Laret, n’eo ket gwelloc’h, kant gwez,
C’heuil doare ar re-goz, hep mez ?

’Wit mont d’ann hôstaliriou,
D’ar bâl, d’ann holl gwall-c’hoariou,
Lec’h ma kolleur arc’hant, iec’hed,
Ha na ziskeur tra-vad er-bed ?

Ann holl draou-koz-se a wez-all
Laka hon c’halon da dridall,
Hag ar goad en hon gwaziou
A domm hag a gri a weziou.

Indann ann douenn mogedet
Alies e song d’im gwelet
Skeud ar re-goz, skeud hon tadou,
A c’houerz ouzimb, hag hon zelaou !

D’alc’het-mad’ta, holl dut ma bro,
Ha stourmet beteg ar maro ;
Stourmet enep ann holl draou-fall
A zeu d’imb euz a du bro c’hall. —


Na zarit ket ho taoulagad
War’r pez ho deûz iwe a vad ;
Met wit ann drouk, laret bepred ! —
« Tra ! tra ! — Nentend ket, nentend ket !

Allaz ! perag na on-me ket
Muioc’h gwiek, kaeroc’h disket,
Ewit prezeg hervez ma c’hoant,
Aotrounez, Itrounezed koant !

Me gomzje flour ha deread,
Me raje ur bouket c’houez-vad
Ewit pep-hini, gant bleuniou
Hon prajou, bruk bon meneziou.

Siouas ! n’omp met tudou dister,
N’anvezomp iez na giziou kèr,
Hag ar bluenn hag al levriou
N’int bet biskoas hon benviou.

Met p’oc’h euz bed ar Vadelez
D’hon zelaou gant kalz karantez,
Ha da reï d’imp lod en ho kouel,
’Wel d’holl vugale Breiz-Izel ;

Wit-omp na omp disket nemeur,
A fell d’imp iwe d’ar breudeur
Deut d’hon gwelet a-dreuz ar mor
Laret, gant eur galon digor : —

— « Breudeur ker, bezomp unanet ;
» Harpomp iez hon zadou bepred,
» Ha stourmomp brema, ’vel gwez-all,
» Enep ar Zaoz, enep ar Gall.

» P’oc’h euz stoket euz douar Breiz,
» Laret, ho kalon en ho kreiz
» N’euz ket tridet gant levenez,
» N’euz ket tridet gant karantez ?


» O klewet kana ar Gwerziou
» Kanet iwe ’n ho meneziou,
» Ho kalonou, breudeur, laret,
» N’ho dêuz ket buhanoc’h lammet ? —

» Laket ho tom en hon hini,
» Ha touet brema ganeomp-ni
» Da veza bepred unanet,
» ’Vel da vreudeur ez eo dleet ;

» Da harpa beteg ar maro,
»Hag en pep-lec’h, iez koz hon bro,
»Ha lavaromp holl en ur vouez,
» Gant fizians ha gant karantez :

» Iez ar C’helted, o iez karet,
» Iez ar Barzed koz a wez-all,
» Mar euz bastarded, trubarded
» Hag as tiles ewit iez Gall ;

» N’euz ket a forz, rag mastaret
» Ve da gozni gant ho fe-fall ; —
» Les-int da ober, da laret,
» Ho c’halon ’zo louz ha tefall !

» Ann holl Vreizaded a gef mad,
» Kaled ho fenn ha tomm ho goad,
» Da harpo beteg ar maro :

» Rag te, iez ker hon zadou-koz,
» A gomzont c’hoas er Baradoz,
» Te eo ar frankiz hag ar Vro ! »


Plouaret — Guengolo — 1867.