Bourapted en tiegeh/Minouréz Kervohon
Minouréz Kervohon, honneh e oè unan ! Paréz dehi ne oè ket. Bras ha koant e oè èl hañni hag ampert d’el labour guel eget dén. En dibab ag er merhed e vehè bet, e larè en dud, kenevé ma oè téchet de glanùat dré pep taul.
« Ne vehè hañni tré d’em merh, e larè minour Kervohon, dohton é unan, a pé ne vehè Intron er Voheréz éh obér el léz dehi mar a huéh. »
Klanùat ne hrè ket ; mohet ne larér ket. Mohet e hrè èl arhul er manér. A vihan éh oè bet ur pen mohér dehi. Dalhet e oè bet pel amzér ér skol aveit hé didéchein. Hé zud e oè un tarh kalon dehè monet énep d’hé chonj hag ind groeit ou diskarg ar er mestrézed skol aveit hé divohérat.
Hag er ré-men e chonjè donet de ben ag hé didéchein get en amzér hag en oed, ha bochadeu treu kaer e larent diar buhégeh er plah de vinoured Kervohon.
Deviz e hrent liés dehè éh è ou merh ar huellat, éh è, a vlé de vlé, nebetoh ha nebetoh de foér Vohon hag é vezé berroh ber hé zroieu é bro er Vohereh. Hoah ur bléad benak hag é vehè bet didéch kaer er plah.
Plijadur e vezè get minoured Kervohon kleuet elsé elsé heijein pér milen diar ou flah, diar hé didéchadur ar gresk.
Hé goarn e hrezant ér skol pel amzér beta ken ne oè bet troieu en trihuéh vlé geti. Nezé en hé digasezant d’er gér, get el leuiné brasan, get er greden éh oè didéchet a gren.
Minour ha minouréz, dré bep taul, étrézè, e vourè deviz a zivout er halanted e jaujè hag e zijaujè doh ou merh.
Ne oè ket bet hir ou leuiné. Guélet e hrezant abret mat, diar ou goal, nen dér ket de ben get doustér ag ur pen mohér.
Krogein e hra énni ur pennad ker sot ma oè bet spontet hé zud hag éleih én ou léh. Unan hag en aral anehè e houlennè mar oè kléñued pé mohereh e hoallè dohti.
Tri dé dohtu é ma chomet én hé gulé hemb dihostal ur gir, na chakein un tam bouid, nag évet un dapen.
Ar en tach, éh oet bet un herrad aveit degas ar hé zro beleg ha médesinour. Ne oè ket bet neoah kaset kemen de hañni anehè, dré ne huélè dén très er marù geti, ha dré ma toujè er minour brudein éh oè kleñùed Intron er Voheréz e oè staget dohti.
Seùel e hra er vinouréz de ben ketan er pearvet dé,
lerhin èl en héaul, ampert d’er labour ha guiù doh en
ol. Divohet e oè : torret e oè hé fennad. Spontet e oè
bet a vitin é kleuet stankoh stank ha stertoh stert
konz a zegas er sourzien ar hé zro.
Divohet e oè aveit ur chachad. Ne oè ket distaget er vohereh azohti. Liés goudé én eskem, é ma bet oeit é guéleu doh Intron er Voheréz. Ur huéh, diù ha tèr pep miz, éh è de zuat d’hé zoul-plouz.
En distéran dra hé zrechilè hag hé zaulè én tu aral d’hé arhulé aveit deu pé tri dé, doh ur chach. Van ne hré na doh her labour, na doh alernadur hé zud.
Kaer e oè obér, nitra nen dè de ben ag hé mohadenneu ; nitra ne dennè ur gonz anehi ; nitra ne hrè dehi dèbrein, nag ivet, na donet tré, beta ken ne vezè goret ha tarhet hé fennad.
Sour a néhans e oè bet ar vinoured Kervohon get ardeu ou merh. Brudein ne vennent ket si fentus ou minouréz. Groeit ou devoè kas diarnehi er vrud n’hé devoè ket iehed hag en dud e gasè hag e cheleuè hé doéré get truhé.
Laret e vezè, get ankin, éh oè péhed bras ma n’en devoè ket plah Kervohon iehed èl er réral ha ma ne oè ket tu dehi, doh en treu-sé, de zisoh a vout minouréz Kernant.
Néhansal e hré enta goah-der-hoah minoured Kervohon. É klask er bihañnan droug ou devoè kavet falloh. É kuhet téch sot ou merh, en ou devoè groeit d’en dud kredein éh oè skoeit er plah d’ur hleñùed dizanaù ha pelleit azohti avelsé er bautred iouank édan diméein.
Get bras tarh kalon ou doé gouiet penaus minour
Kernant en devoè troeit kein dehi aveit klask, é léh
aral, ur plah digleñùet.
Ou chonj e oè bet a viskoah diméein ou merh dehon.
Hag en dud e larè eùé : « Eurus e vo plah Kervohon get minour Kernant ; erhat e vo minour Kernant get minouréz Kervohon. »
Hag un dé, minour Kernant e larè de vinour Kervohon : « N’hellan ket diméein d’hou minouréz ; n’hellan ket kemér un dermeréz, na n’hellan ket. Droug pé ne vo genoh, éh an de lakat me chonj én ul léh aral, get ur plah e vo guel iehed dehi. »
Mouget e oè bet kalon minour Kervolon get er boén hag en ankin é kleuet konzeu minour Kernant. Ha neoah ne oè ket hembkin minour Kernant e droè kein de Gervohon : minour Kerbala, minour Kervénen, minour Kerdeg, hani Kerflour ha dek aral e hré èldon.
A sul de sul éh a plah de gouhgroah, a vleuen de vleuen é huengam er pen ; en oed e iè ar vinouréz Kervohon.
Kaer e oè kas duhont ha dumen atrakizion, darboderion de jiboésat galanted, hañni ne chomé de vout koévrateit. Rah é larent : « Ur gaer a blah é minouréz Kervohon. Nen dé kin meit un dermeréz ha termeréz én un tiegeh, nitra goeh. »
Bras e oè enta néhans minoured Kervohon diar dezoned ou merh, pé kentoh, ar vrasat éh è dé ha dé. A houdé un hantér dousén bléadeu, é hrent, pep plé, duhont ha dumen, pemp pé huéh perhinded aveit didéchein ou merh.
É pep léh éh oent bet é perhinded ha guel get ou merh nen dé ket. Hag ind dilézet er perhindedeu get er greden ne anaùent ket er perhindedeu e rekezè bout groeit revé chonjeu en dud.
Deusto d’er véh e blegè ou fen én ur chonjal éh ent, aveit er huéh getan, de zizolein téch ou merh, donet e hrant de gavet er person de houlen ali geton, d’en aters émen é jaujè dehé monet de berhindetat, de spizein dehé pé sant na pé santéz e oè mat doh er voheréz.
Boemmet bras é ma chomet er person doh atersereh ré Kervohon ; ou davé e hra én ur laret dehé ne anaùè nitra de ésat d’er voheréz nameit gloèuennereh pen er vah.
« Ia, Eutru person, rè vras é bremen er plah-ni aveit asé er huelladen-sé. »
« Ia, minour Kervohon, ha rè hoann, ha rè dinér hou kalon èl perpet. »
Goudé guél minour Kervohon doh er Person, é ma hoah oeit néhans tud er plah ar vrasat. Hoah ur bléad benak ohpen, meùelion ha kemenérion ne séllezent ket dohti. Hoah ur maréad hag é vo daù dehi kouh groahein.
Ne oè ket a laret, mal e oè didéchein er plah ; mal e oè davé Intron er Voheréz pelloh. Ret e oè klah sekour get en dud a pe oè dihellout kaer er sent. Ne vehè bet ataù nitra de gol mar ne vezehè ket kavet gounid.
Hag un dé, minour Kervohon, goudé bout kampouizet én é ben ol er chonjeu-sé, goudé bout sellet droug ha mâd peb unan anehè, e blom ar é arzaù én ur zistill é gonzeu gir ha gir :
« Ur horvad méh e vo ret dein rein dehi get un dianvézour. A huerso éh onn bet é spiein penaus konz a zegas beleg ha médesinour ar hé zro e zo bet dalbéh en dra guellan hag er buañnan d’hé divohet. Hama… (ha ean de sourein de zistill é gonzeu tam ha tam), hiziù ketan é tei er médesinour ar hé zro, ha, mar bè ret, en trenoz é tei er beleg. »
Kentéh èl en anderùiad-sé éh oè Eutru er Strinkel é Kervohon doh gulé er vinouréz. Obér e hrè lusk a glask hag anaùet hé hlefiued hag hé droug. Hé sontein e hrè. Sellet e hré doh poul hé arzorn ha paud a ardeu aral e hré hoah revé é vichér.
Distroein e hra embér d’er minour hag ean oeit ha laret :
« Hou merh nen dé ket klanù de varù, er minour. Kredein e hran é vo éseit dehi abret mat mar karet obér, hed ha hed, en asé guelladen éh an de spizein deoh.
« A ol er bochadeu treu e hellér implé aveit guellat d’hou merh, éh an de zispleg deoh en ésan hag eùé en diszroukan.
« Doh ret éh eemb goudé de dreu diésoh ha poéniusoh. Sellet penaus é ma er hetan :
« Hé brelinsein e vo ret deoh, get deur fresk, tèr guéh en dé, de vitin, de greisté ha de guh héaul, beta ken ne vo éseit dehi.
« Brelinset hé hemb truhé, get diù ha tèr seillad sel taul, hag ohpen mar karet. Mar ne vè ket éseit dehi aben eih té, degaset kemen dein hag é tiférein deoh un asé aral poéniusoh. »
Diar er honzeu-men é ma distroeit Eutru er Strinkel d’er gér.
Er minour, hag en devoè er greden é vehè bet didéchet é verh get er horvad méh, e ia un herrad de ambrug er sourzien ar en hent aveit rein amzér d’é verh de zonet tré ag hé gulé.
Fari e hré er minour. Er voheréz ne chonjè ket seùel. Hag er minour é huélet en doéré, saùet ur hoahad téroni édan é dok ha distillet dohton é unan : « Ne blégein ket pelloh : goah ar hoah é ma oeit hé fen boh ; duoh du é ma hé deulagad hag aheurtetoh aheurtet de zigonz. Deusto d’er boén e zo genein, ret é dein sentein doh gourhemenneu er médesinour hag obér revé é zevizeu. Ne vo ket ataù kol aveidonn mar ne gavan ket gounid. Damb d’er labour hag édan volanté Doué ! »
Ur prantad arlerh éh oè minour Kervohon tâlet doh gulé er plah, ur seillad deur ién doh é dreid, ur glogé én é zorn deheu, ur bar buns én é zorn klei é vrelinsein er voheréz. Trohein e hra arnehi èl un dal.
Goal bèl ne voé ket en ésaden é tonet. Kaer e oè bet d’er plah sinal, garmein, huchal éh oè disiet dehi de vad, difranjal duhont ha dumen ha diskrabellat, brelinsadur e goéhè arnehi hemb dihan.
Doh hesk er getan seillad, épad m’é ma bet er minour é vonet d’er puns de dennein ur seillad aral é ma deit er voheréz tré ag hé zoul plouz.
En ur zonet én ti, ean hé hav plomet ar hé deu droed é tiséhein brelinsadur en deur diar hé horv. Un herrad goudé éh oè gé ha gei, ha hi de lakat hé liéneu de séhein.
Adal en dé-sé, minouréz Kervohon nen dé ket bet oeit kin é guéleu doh Intron er Voheréz.
Embér goudé é ta, hemb dihan, ioheu galanted é guéleu dohti.
Ur blé arlerh éh oè diméet de vinour Kerfetan.
Dé héh eured, oheh Kervohon e larè étré deu chistr :
« Bras é me leuiné hiziù : pried é me minouréz de vinour Kerfetan, un dén a vod. Ne talv ket neoah minour Kernant em boé mé choéjet aveit rein dehi. Iùin e vo geti ha genein ma n’en des ket lézet me chonjen de zonet de vad.