Ar rozen hag ann eostik

Eus Wikimammenn
Sauter à la navigation Sauter à la recherche


Ar rozen hag ann eostik


skrivet gant Claude Guitterel


Kendalc’h keltiek etrevroadel
Sant Brieg 1867



DA EOSTIK KOAD ANN NOZ,

SON SAVET
Gand BARZ AR BLAONEZ

D’ar Barz a behini ar vouez,
Ouz riblou drand ann Treo,
A red e Breiz ker kaer, ker frez,
A hegleo da hegleo :
D’ar Barz zo eostig enn he iez ;
Gwel, vid enn he hano ;
Eur c’hloarek, ganet e kerne,
A westl, e derou ar bloaz-man,
Eur merg a garante,
Eur zoun zavet gant-han.
 

AR ROZEN HAG ANN EOSTIK.

War don : Evnig a gan (Barzaz Breiz).

E kreiz eul liorz e vleunie,
Enn eunn nevez-amzer a oe,
Eur rozennik ouz ar gaera,
A daole c’houez ouz ar c’houeka.
 
Ar bokedou all, tro-war-dro,
A vije gwenvet ha maro,
Siouaz ! arog ann abardez,
Hag hi savet da c’houlou dez !
 
Hogen, na reo ien ar beure,
Nag ann heol kalet, da greiz-de,
Nag e nep mare ar preved,
D’ar rozen na reand droug ebed.
 
Rag eunn eostik kalonet mad,
Tost dezhi o kluda dalc’h mad,
A gemere out-hi preder,
Vel eur breur mad ouz eur c’hoar ger.


Dindan he askell, d’ar beure,
Ouz ar reo ien he diwalle ;
Ha da greiz-dez, he askell c’hoaz,
A zisheolie he deliou noaz.
 
Hogen eunn dez ar rozen fol
A c’hoanteaz gwelet ann heol,
Hag a laraz d’he c’hanerik :
« Pella diouzin eunn tammik. »
 
Hag enn eur brezeg evel-se,
Gand he drein lemm hi hen broude ;
Ken a hirvoude ar paourik,
O vont kuit : « Truez, va c’hoarik. »

Raktal hag heol ha reo a gouezaz
Preved fleriuz a ziredaz ;
Ar rozen wenn a velenne ;
E diwaller kez a wele.
 
Gand keuz zoken maro vije,
Ouz troad ann hini a gare,
Ma n’en dije hastet hou-ma
He aspedi d’he skoazella.
 
Hag ar rozen da aslufra,
Hag ann eostik da askana :
Neuz eurusoc’h evn er c’hoajou.
Na kaeroc’h bleunen er parkou,
 
Breiz ker, te eo ar rozen-ze,
Ha da vraventez eo da fe ;
Ann eostik-ze, ker karadek,
Eo da iez koz ar brezonek.
 
Ar reo, ann heol iud, ar preved.
Eo ar ioul fall, ar glouarded,
Al leoriou louz, ar c’hiziou fall
Taolet war-n-out gant iez Bro-c’hall.


Selled ec’h euz, siouaz ! kalz re,
Ouz ar c’hoz krampinellou ze ;
Digor affo da zaoulagad…
Eberr e vezo divezad !
 
Ho ! ma fell d’id atao lintri,
Enebourien da iez trec’hi ;
Breiz, ma bro gaer, gwir rozennik,
Kar ha mir bepred da eostik.